DIY garðborðið mitt fær andlitslyftingu

 Stóra borðið á pallinum var farið að láta á sjá og því ákvað ég að hreinsa mósaíkflísarnar af því og breyta útlitinu. Ég fór auðvitað á Pinterest og safnaði hugmyndum í nýja möppu til að vinna út frá. Mig langaði að nota vörubretti og helst fá svolítið grófan við. Pabbi var svo elskulegur að koma færandi hendi með tvö stór vörubretti sem ég reif í sundur og naglhreinsaði, ég fékk smá aðstoð við að búta fjalirnar í réttar lengdir og ég pússaði, málaði og pússaði meira.

 Ég fór í Húsasmiðjuna og keypti málningu og fermingardrengurinn sem afgreiddi mig sagði það góða hugmynd að nota Lady innanhúsmálningu í svona verkefni þar sem sú málning væri akrílmálning og það er víst bara gott. Ég keypti því eina prufudós af bláa litnum en átti hvítt og grænt í bílskúrnum.

 Ég ákvað að olíubera borðið í lokin til að skerpa á litunum og finnst það hafa heppnast vel. Vona að þessar tilfæringar mínar séu ekki mjög misheppnaðar en það verður tíminn að leiða í ljós.