Milli hátíða

Þarna erum við á aðfangadag rétt áður en hátíðin gekk í garð, allt tilbúið. Við vorum 4 heima á aðfangadag, á jóladag var jólaboð hjá tengdó, á annan var jólaboð fyrir mína fjölskyldu heima hjá okkur.

Á fimmtudaginn vorum við bara heima og borðuðum afganga, ég fór í vinnunna, fyrst upp á verkstæði að reikna launin og síðan heim og fór að búa til próf, aðeins að flýta fyrir áður en próftörnin byrjar nú í janúar. Í gær fór ég svo í bæinn, ein. Ég fór í Kirsuberjatréð og skipti peysunni sem ég fékk frá Sigga, ég fékk æðislegt pils og spiladós í staðinn, síðan fór ég á Lækjarbrekku. Kallinn sagðist vera búinn að hringja í alla sem hann gæti hringt í vegna frakkans en ekkert hefði komið út úr því. Hann bauð mér að taka frakkann sem var skilinn eftir í staðinn. Ég þáði það, frakkinn smellpassaði, auðvitað!, og svei mér þá ef þetta er ekki miklu dýrari frakki, merkið er Matinique, er það ekki eitthvað svaka fínt? Kom svo við á leiðinni heim í Manni lifandi, fékk mér að borða og keypti hnetusteik í kvöldmatinn. Guðný og co komu svo í mat um kvöldið.

Það eru allir hér búnir að hafa það rosa fínt um jólin, enda ekki hægt að búast við öðru, góður matur, mikið af sætindum, gott fólk í kringum okkur, fallegar gjafir o.s.frv. Verst hvað spáir illa fyrir gamlárskvöld, og ég sem ætlaði að taka geggjaðar flugeldamyndir.

Gleðileg jól

Ég óska þess að gleði og friður ríki á jólunum. Ég óska þess að börn verði stillt og góð. Ég óska þess að öllum líði vel.

Ég þakka fyrir hvað ég á yndislega fjölskyldu. Ég þakka fyrir hvað ég á marga góða vini. Ég þakka fyrir hvað við höfum það gott. Ég þakka fyrir að við búum ekki í stríðshrjáðu landi.

Gleðileg jól

Kónguló, kónguló, vísaðu mér ...

Ég var að hringja í netþjónustu Vodafone núna áðan útaf dónalinkunum í gestabókinni hjá bekknum (og reyndar fjölskyldunni líka). Maðurinn í þjónustuverinu sagði að þetta væru svokölluð kóngulóarforrit sem leita á netinu að svona galopnum gestabókum eins og frontpage gestabækurnar eru og setja einhvern óþverra inn á þær. Þannig að ég ákvað að loka bara gestabókunum á meðan þetta gengur yfir, því ekki vil ég hafa einhvern óþverra fyrir börnunum.

Við fórum, öll fjölskyldan, upp í Heiðmörk í gær og söguðum okkur jólatré. Það var mjög skemmtilegt fyrir utan það að stelpurnar voru svo þreyttar að þær lögðust niður í hverju skrefi og vildu hvíla sig, og Ólöf vældi af þreytu. Enda ekki nema von því þær fóru ekki að sofa fyrr en eftir kl. 11 sú yngri og kl. 2 sú eldri, þær voru hjá frænku sinni sem heldur að hún sé voða góð við þær að leyfa þeim að vaka eins lengi og þær vilja og gefa þeirri yngri sex diska af kókópuffsi í morgunmat.

GM og JÁ gistu hjá okkur í nótt, alltaf gaman að hafa svona flotta krakka í heimsókn. Þau voru öll sofnuð um kl. 10 því ekki vilja þau missa af jólasveininum. Við vorum nefnilega í heimsókn hjá Þuru og Guðmundi því Þura átti afmæli, til kl. 9:30.

Bökunardagur

Nú er ég bara heima að baka, þökk sé þessu fína óveðri sem gengur yfir landið. Við mæðgur fórum auðvitað í skólann í morgun, en þá var verið að snúa öllum við og senda heim, þannig að skömmu seinna fórum við bara líka. Frábært að fá svona einn aukafrídag rétt fyrir jólin. Ég man ekki hvenær skóla var síðast aflýst vegna veðurs það eru svo mörg ár síðan.

Nú ætlum við því að fara að baka og skreyta piparkökur, kannski gerum við líka piparkökuhús. Ég er búin að baka engiferkökurnar mínar, uppskrift sem ég fékk á Austurborg þegar ég var að vinna það, geggjaðar kökur, kannski ég skrifi bara uppskriftina hér:

• ENGIFERKÖKUR
• 500 g hveiti
• 500 g púðursykur
• 250 g smjörlíki
• 2 egg
• 2 tsk lyftiduft
• 2 tsk natron (matarsódi)
• 2 tsk engifer
• 2 tsk negull
• 2 tsk kanill

Hnoðað deig. Búið til lengjur úr deginu (um 2 fingur að þykkt) og skerið í um 2 cm þykka bita. Raðið á bökunarplötur. Hafið smjörpappír undir. Bakað við 200°C í u.þ.b. 8-10 mín. Ath. uppskriftin er stór, fer á 4 plötur hjá mér.

Verði ykkur að góðu

Jólakveðja til ykkar frá okkur

Smellið á slóðina hér fyrir neðan og njótið

http://www.elfyourself.com/?id=1258925138

(Takk Sandra)

Kveðja
Jólaálfarnir í Grafarvoginum

Týndur frakki

Við fórum, öll stórfjölskyldan, á jólahlaðborð á Lækjarbrekku í kvöld. Sem var frábært, alveg þangað til við ætluðum heim. Þá kom í ljós að frakkinn hans Sigga var ekki í fatahenginu! Hann keypti frakkann í október þegar við vorum í Budapest. Rosa fínn frakki. Fúlt, fúlt, fúlt, arg.



Annars er laufabrauðið á dagskrá á morgun hjá mömmu, svo ætlum við Svala að hittast á sunnudaginn og reyna að lesa saman fyrir þetta próf sem við förum í á þriðjudaginn.



Ég byrjaði að prenta út dagatölin í dag, mig vantar ennþá myndir frá sumum til að gera dagatalið fyrir ömmu og afa. Ég ætla að klára þetta um helgina, prenta rest á mánudaginn og koma þessu í gormun á mánudag! Það hlýtur að takast.
Ég fór með stelpurnar í stúdóið sem IH er búin að útbúa í Engjaskóla í síðustu viku og tók jólamyndir af þeim. Þær tókust bara svaka vel, þó engin væru stúdíóljósin, bara flassið á vélinni notað. Ég á örugglega eftir að nota þetta oftar.

ritstífla

Ég var að spá í að blogga um lengingu kennaranáms, en svo er ég eiginlega hætt við það því þegar ég byrjaði í Kennó 1991 áttum við að vera fyrsti árgangurinn sem færi í gegnum 4 ára nám. Það var sem sagt hætt við það um áramót 1991-2 vegna fjárskorts. Ég get ekki ímyndað mér annað en þessi saga verði eins núna, þannig að ég nenni ekki að eyða orðum í hana.

Jólastemningin er að komast á fullt skrið. Ég og Ólöf kláruðum jólakortin í gærkvöldi. Það er allt að verða tilbúið til að prenta dagatölin, búin að skipta um blek í prentaranum og fá mér pappír.

Siggi setti upp útiseríurnar um síðustu helgi og ég þarf að finna jólasveininn sem passar útidyrnar.

Ég var að reyna að hlaða niður svona "actions í Photoshop" eins og Ásta gerir. Ég fann nú eitthvað til að hlaða niður, en hvað svo .... kann ekki að setja þetta upp. Hjálp! Ásta viltu skipta á einstaklega fallegri og unglegri gínu og hjálp í photoshop?

Ég reyndi að setja svona jólaútlit á síðuna eins og Elín er með, en það er ekki boðið upp á það, fúlt. En ég set bara jólamyndir í bloggið í staðinn ;-)

Til hamingju með afmælið pabbi minn.

byrjuð á jólaverkunum ...

Ég gerði helling um helgina:

• byrjaði á smákökubakstri, tvær sortir
• byrjaði á vettlingum handa Þórunni, út af sottlu
• byrjaði á dagatölunum, fyrir ömmur og afa í jólagjöf
• byrjaði að kaupa jólagjafir, nú er tilbúið það sem þarf að senda út í DK
• byrjaði á jólakortunum, búin með umslögin

Ég fór áðan og ætlaði að kaupa Dextra-pappírinn í Odda (nei afsakið A4) til að prenta dagatölin. Þá var hann auðvitað uppseldur, kemur í lok vikunnar.

Ég fer á morgun í Borgarleikhúsið að horfa á úrslitin í Skrekk, Þórunn tekur þátt. Svo er bekkjarkvöld hjá Ólöfu á miðvikudaginn. Guðný, Guðrún María, Þórunn og ég förum á tveggja daga tálgunámskeið um helgina. Við Siggi förum á tónleika með Hannesi og Gull á laugardaginn (Kim Larsen). Svo er það auðvitað Köben eftir örfáa daga.

Brilljant grein í Fréttablaðinu í dag

Þessi grein sem birtist í Fréttablaðinu í dag er algjör snilld, hún segir allt það sem kennarar vilja segja opinberlega en geta ekki sagt vegna þess að þeir eru bundnir trúnaði við sína skjólstæðinga og fjölskyldur þeirra.

Yfirvöld þurfa í alvöru að fara að hugsa um það hvernig menntastofnanir þeir vilja hér á landi. Ég t.d. vil skóla með aðgreiningu. Nú verða kannski einhverjir hneykslaðir en það er ekki eðlilegt að sama barnið / eða sömu börnin komist upp með það árum saman að halda heilu bekkjunum í "gíslingu". Hver er réttur þeirra barna sem eru ekki veik, ekki illa upp alin og gera allt sem þau eru beðin um?

Vonandi er hægt að lesa greinina hér til hliðar með því að smella á hana. Þessi maður á heiður skilinn fyrir framtakið.

Jólin, jólin í IKEA

Við Ólöf fórum í IKEA áðan, ohhh nú getur jólaundirbúningurinn hafist á mínu heimili. Ég keypti jólapappír o.fl. skemmtilegt.
Næst á dagskrá er svo jólasmákökur, ég er að vísu búin að "baka" eina sort, sort sem ég "baka" alltaf fyrir jólin en það eru kókostopparnir frá Karen Wolf í Bónus, mmmm svo góðir og fljótlegir í bakstri.
Svo þarf að fara að spá í jólagjafirnar, ég er nú eiginlega búin að finna erfiðustu gjafirnar sem eru til systkina okkar Sigga, á bara aðeins eftir að skoða það nánar.
Svo eru það jólaseríurnar, þarf að koma þeim upp fljótlega.

Þarf frið og ró

Ég kom heim um hálf sjö eftir langan fund hjá trúnaðarmönnum. Þá var Ásta í heimsókn og Sandra með Birtu. Frábært að hitta þær mæðgur, allt of langt síðan síðast.

Ásta, Ólöf og Birta voru með fimleikaæfingar á stofugólfinu, Þórunn talaði og talaði við mig, ég var að reyna að klára vinnudaginn, með því að svara tölvupósti og senda ástundunina. Mamman hennar Ástu kom og sótti hana .... úff of mikið áreiti.

Vonandi verður helgin róleg. Þórunn verður ekki heima næstu daga vegna Skrekks, stífar æfingar framundan og undanúrslit á þriðjudagskvöldið.

Kannski nota ég bara helgina til að fara út og ljósmynda. Ég er búin að vera svo ódugleg við það undanfarið. Við Guðný getum kannski farið saman og æft okkur. Þetta er mynd sem ég tók á myndavélina hennar Þórunnar í Budapest.

Kæri Jóli ...

Dagur 5

5. Foreldri mun fá forgang fyrir börn sín á frístundaheimili og/eða leikskóla á meðan það starfar á þessum stofnunum.

Þetta er nú gamalt og hefur verið svona í mjög mörg ár. Þegar Þórunn var 10 mán. (fyrir 12 árum) fékk ég forgang fyrir hana af því að ég fór að vinna á leikskóla á sama tíma. Hin stelpan mín komst ekki að fyrr en 3 ára af því að þá var ég farin að vinna í grunnskóla.

Það var stíf umræða um kosti þessa bréfs og galla á kaffistofunni í dag. Það var einn athyglisverður punktur sem kom fram: ekki líta á þetta sem kjarabót heldur sem fríðindi sem fylgja starfinu. Og alls ekki tengja þetta við komandi kjarabaráttu. Eftir að ég fór að hugsa svoleiðis er ég ekki eins reið. Þó að flest atriðin í bréfinu komi mér ekki að gagni að þá á ég kannski eftir að nýta mér eitthvað. (Nú hef ég aldeilis smitast illa af Dagnýjarjákvæðni.)

Kæri Jóli ...

Dagur 4

4. Starfsfólk sem býr að reynslu úr sambærilegum störfum úr öðrum sveitarfélögum eða ríki mun frá og með 1.nóvember fá þá reynslu metna inn í kjör sín hjá Reykjavíkurborg.

Ég er nú svo fáfróð, hefur þetta ekki verið metið hingað til? Hefur starfsfólk, t.d. kennarar sem færa sig á milli sveitarfélaga þurft að byrja á núlli hvað starfsaldur varðar?

En ef maður færir sig á milli starfa innan Reykjavíkur fer t.d. af leikskóla yfir í grunnskóla, er það metið? Hefur það verið metið hingað til? Ef svo er hefur vantað tvö ár á minn kennsluferil í 10 ár.

Þetta er svona atriði sem lítur vel út á pappír en afskaplega fáir geta notfært sér.

Eftir því sem ég fer betur ofan í þetta "tilboð" verð ég alltaf svekktari og svekktari og samt gerði ég mér engar vonir um neitt fyrirfram. Það er eins gott að launanefnd sveitarfélaga taki almennilega á málum þegar samningaumleitanir byrja nú eftir áramót því það er ekki margt sem heldur venjulegum kennurum á besta aldri eins og mér í starfi ef það verða ekki verulegar launahækkanir. Launahækkanir eru nefnilega það eina sem verður til þess "að gera störf innan borgarinnar samkeppnishæfari og starfsandann betri".

Kæri Jóli ...

Dagur 3

3. Starfsfólk leikskóla, grunnskóla (1.-4.bekk) og hjúkrunarstofnana sem skylt er að snæða hádegismat með þjónustuþegum sínum - og kýs að taka ekki styttri vinnutíma á móti - mun, frá og með 1.október, fá greitt fyrir þær stundir í yfirvinnutímum.

Nú jæja, ekkert hér fyrir mig því ég kenni 6. bekk. Þetta breytir heldur engu fyrir kennara í 1. - 4. bekk því þeir fá nú þegar greitt fyrir þessar stundir í yfirvinnu. Þegar ég vann á leikskóla (1995-7) unnum við frá 8-16, borðuðum með börnunum, fengum frían mat og vorum í 100% starfi. Kannski er eitthvað breytt síðan þá, ef ekki þá er ekkert nýtt hér.

Vel meint kæri borgarstjóri, en ...

Kæri Jóli ...

Dagur 2

2. Tvö hundruð milljónum verður ráðstafað í sérstakan "pott" sem stjórnendur þeirra stofnana sem glíma við manneklu geta notað til þess að umbuna starfsfólki sínu vegna margs konar álags eða til að bæta starfsanda á annan hátt.

"Stjórnendur þeirra stofnana sem glíma við manneklu ...?" Hvaða stofnanir ætli það séu? Ætli það sé mín stofnun, þar sem tveir sérkennarar af þremur hafa hætt nú í haust og það á ekki að ráða í staðinn fyrir þá vegna þess að við vorum með "of mikla" sérkennslu í fyrra. Hvernig er hægt að vera með of mikla sérkennslu, við erum bara með of mörg börn sem þurfa á mikilli aðstoð að halda, eigum við að henda þeim út úr skólanum núna?

Eða er mannekla hjá okkur þar sem flestir voru settir í meiri kennslu en þeir báðu um vegna þess að ekki fengust fleiri kennarar til starfa?

Hvað eru 200 milljónir fyrir margar stofnanir? Í Reykjavík eru um 43 grunnskólar, tæplega 100 leikskólar ef ég man rétt og eru ekki stofnanir fyrir eldri borgara inn í þessum pakka líka?

200.000.000 / 150 stofnanir = 1.300.000. Ætli þetta sé á mánuði? Nei, nei, þvílík bjartsýni, þetta er fyrir þetta ár og það næsta, 14 mánuði. Það er sem sagt um 100.000 kr á mánuði sem hver skólastjóri hefur til að umbuna öllu sínu starfsfóli á mánuði, hjá okkur eru um 50 starfsmenn sem þýðir 2000 kr á mann á mánuði ef þessu yrði dreift jafnt á alla.

Ég bíð spennt eftir að sjá hvernig þessi klausa kemur út í reynd.
Takk fyrir þetta borgarstjóri, þú ert æði!

Kæri Jóli ...

Dagur 1

1. Öllum þeim sem vinna hjá borginni í föstu starfi stendur til boða 16 þúsund króna heilsuræktarstyrkur (miðað við fullt starf), árskort í sundlaugar, safnakort, bókasafnskort og heilsársaðgangur að Fjölskyldu- og húsdýragarðinum, frá og með 1. janúar 2008.

Takk fyrir þetta kæri borgarstjóri, ég er að vísu nýbúin að endurnýja bókasafnskortið mitt, takk samt, við förum örugglega tvisvar á ári í Fjölskyldu- og húsdýragarðinn, þannig að það er nú alveg heilmikil kjarabót. Ætli þessi heilsuræktarstyrkur fari í gegnum launakerfið eins og 12000 kr. styrkurinn sem er nú þegar er veittur þannig að eftir stendur um 9000 eftir skatta???
Og það besta er að þetta kemur ekki fyrr en eftir tvo mánuði þannig að ég hef eitthvað til að hlakka til :-)

Ein rosalega "glöð" að vinna hjá svona "frábærum vinnuveitendum" sem neyða mig í sumarfrí um miðjan vetur og ég fæ ekki einu sinni 25% álag á frídagana mína eins og maðurinn minn fengi ef hann neyddist til að taka sitt frí utan venjulegs sumarfríistíma.

Bara einn dagur í vetrarfrí ...

... og ég sem þoli ekki þessa fáranlegu hugmynd að taka daga af sumarfríinu mínu til að nota þegar ég þarf ekki á þeim að halda í kulda og trekki. Ekki misskilja mig ég er alltaf til í að fá frí, en ef það styttir sumarfríið mitt finnst mér það ekki fyndið.

Fékk svar frá kennarasambandinu í dag. Eins og mig grunaði er ekki leyfilegt að hafa launatímabilið frá 10. - 9. fyrir yfirvinnutímana, það mega ekki líða meira en 15 dagar frá lokum tímabils til útborgunar. Næsta skref er að segja Ásu þetta og Rósu hjá Menntasviði. Vonandi gengur það þrautalaust fyrir sig.

Mamma og pabbi eru á leiðinni til Kanarí í fyrramálið í heilan mánuð, ég væri sko til í að lauma mér með.

Ég hitti Ástu á ganginum eftir fundinn erfiða í dag. Við ræddum um að nú þegar faggreinakerfið væri komið á væri engin ástæða að við, þessir umsjónarkennarar, værum alltaf með umsjón. Okkur fannst kominn tími til að dreifa ábyrgðinni og "leyfa" fleirum að komast í jobbið. Það fer fáranlega mikill tími í umsjónarstarfið og fyrir það er greiddur einn skitinn launaflokkur, 5000 kr fyrir skatta. Það væri hægt að ná inn sama pening með því að taka tvo forfallatíma á mánuði, takið eftir!, á mánuði, ekki viku.

Ef ég verð næsta vetur vil ég ekki umsjón, og hana nú ...

ein þreytt eftir erfiðan dag á vitlausaspítalanum

brjáluð vika

Við komum heim frá Búdapest kl. hálfsex í gærmorgun. Ég ákvað að fara ekkert að sofa (þá hefði ég örugglega sofið til hádegis), las bara blöðin, borðaði morgunmat, skoðaði tölvupóstinn og gekk frá úr töskunni áður en ég fór í vinnuna. Þriðjudagar eru lengstu dagarnir mínir, 7 kennslustundir í röð, en ég var búin að panta "vísindamann að láni" þennan dag, algjör snilld. Vísindamaðurinn minn, Hafrún, rafmagnsverkfræðingur, kom kl. 10:30 og var með skemmtilegan fyrirlestu x 4. Þ.e. ég gat platað hana til að halda fyrirlesturinn fyrir alla 4 hópana mína í stærðfræði. = Rólegur tími fyrir mig. Ég fór heim um kl. hálf fjögur, hélt áfram að vinna í tölvunni til rúmlega átta og var sofnuð um hálftíu. Ekkert svo erfiður dagur.

Var á fullu í dag að undirbúa foreldraviðtölin á morgun. Var í vinnunni til hálfsex og náði að klára allt fyrir morgundaginn nema setja fyrir heimavinnu fyrir næstu viku, geri það á eftir.

Síminn hringdi hérna þegar ég var á leiðinni út í búð eftir að hafa farið með Ólöfu í fimleika kl. sex. Í símanum var einhver strákur sem talaði bara fr....ísku, ég skildi ekki nema helminginn af því sem hann sagði og samt er ég nokkuð góð í fr....ísku (talaði heillengi við Fr... í dag og skildi næstum allt). Ég held að strákurinn hafi verið að reyna að selja mér áskrift af lottói. Þoli ekki óskýrmælt símasölufólk ... arg

Annað sem ég þoli ekki er þegar maður bíður eftir töskunum á flugvöllum. Flestir raða sér svo þétt upp við færibandið að það er ekki nokkur leið að komast að bandinu ef maður sér töskuna sína. Er að spá í að mæta með gult límband næst þegar ég fer til útlanda og líma hringinn í kringum bandið í svona meters fjarlægð og skrifa: standið hér á meðan þið bíðið eftir töskunum.

Þoli ekki heldur matreiðsluþætti í sjónvarpinu, allt svo auðvelt og einfalt ... þetta er ekki hægt í alvörunni!

Jæja nú er ég hætt að vera pirraða Barbie

Ég ætla að reyna að láta Þórunni og Sunnu passa Ólöfu í fyrramálið á meðan ég er með viðtölin, vonandi sofa þær bara út, horfa á eina mynd og rífast ekkert áður en ég kem heim kl. 1. Þetta er samt algjört happdrætti.

En nú er komið að því að vinna upp í íslenskunámskeiðinu, á eftir að hlusta á 2 fyrirlestra og lesa eitthvað líka áður en við hittumst á morgun til að fara yfir næsta verkefni sem á að skila á morgun.
Svona hættu nú að blogga stelpa!

bílastæðaklukkan mín góða

Litla sæta vörtusvínið mitt fór í skoðun um daginn og þá fékk ég bílastæðaklukku í leiðinni. Við systur fórum svo í bæinn um daginn og þegar ég ætlaði að fara að leita að peningum í stöðumælinn sagði systir, bíddu áttu ekki bílastæðaklukku? Við skelltum klukkunni í framrúðuna og stilltum hana samviskusamlega og fórum hæstánægðar að rölta á Laugaveginum. Svo færðum við bílinn, stilltum klukkuna aftur og vorum yfir okkur sælar að eiga svona flotta bílastæðaklukku. Þegar ég kom heim fór ég auðvitað að monta mig af minni fínu klukku, því Sigga bíll er svo mikill eyðsluhákur að hann fengi aldrei svona flotta klukku. Hann sagði bara: já, flott hjá ykkur en er ekki laugardagur og frítt í bílastæðin?

Snilldarormur

Það er ekkert smá rólegt hér heima á kvöldin núna. Elín gaf mér ljósrit af æfingaorminum sem sonur hennar fékk í fiðlutíma. Nú er Ólöf farin að passa upp á klukkuna á kvöldin, hún á að lesa, hátta og bursta tennurnar fyrir kl. 8 og þá má hún gefa orminum að borða. Og hún er svo ánægð og stolt af sjálfri sér. Það er ekki einu sinni búið að bjóða henni einhver verðlaun, henni finnst bara æðislegt að fá að setja límmiðafrosk í magann á orminum. Eins og ég segi - hreinasta snilld.

Það eru alltaf skemmtilegar umræður á kaffistofunni, í dag vorum við Elín að ræða um að sækja um aðra vinnu, vera svona leiðbeinandi á undanþágu (eins og í grunnskólunum). Mig langar að vera byggingaverkfræðingur, ég hef mikla reynslu af byggingum, ég hef búið í húsi alla mína æfi, ég hef tekið þátt í að byggja 3 hús, tvö þegar ég var krakki og svo húsið sem við búum í núna. Ég veit alveg hvernig hús á að líta út svo ég held bara að ég væri svolítið góð í þessu. Elín ætlar að verða tannlæknir, hún hefur burstað tennurnar í sjálfri sér og 3 sonum sínum, hún hefur oft farið til tannlæknis og getur örugglega lært að nota loftsprautuna o.fl. tól.

Siggi er bara í bílskúrnum þessa dagana að setja samlæsingar í jeppann og Þórunn nennir ekkert að gera í skólanum og þarf því að eyða öllum kvöldum í heimalærdóm. Sem sagt - bara rólegt hjá mér.

Kveðja
Pæjan á hælaskónum

Myndatiltekt

Ég var að taka afrit af myndunum í stóru tölvunni og rakst þá á þessa mynd. Þetta er uppáhaldsmyndin mín. Hún er tekin í listaverkagarðinum vestast í Grafarvogi í júní sl. og er af okkur Sigga. Ég tók hana sjálf á tíma, stillti Sigga upp, ýtti á takkann og hljóp svo á réttan stað.

Úff, pjúff

Hvað er maður eiginlega að spá að vera í þessu starfi. Ég fékk launaseðilinn minn á mánudaginn og er næstum búin að vera grátandi síðan. Í fyrsta lagi lækka mánaðarlaunin mín úr 224.000 niður í 218.000 frá því fyrra af því að þetta árið er ég með 17 nemendur í umsjón en var með 20 nemendur í umsjón í fyrra, þannig að nú fékk ég „leiðréttingu“ á laununum fyrir ágúst og september. Svo eins og það væri ekki nóg, þá fékk ég líka bara meðaltalið af yfirvinnunni greitt, ég á semsagt að kenna 4 yfirvinnutíma á viku (sem ég bað ekki um = svona er kennaraskorturinn leystur) fyrir áramót en 2 yfirvinnutíma eftir áramót. Hjá Reykjavíkurborg er það viðurkennd vinnuregla að þá fái ég greidda 3 yfirvinnutíma allan veturinn. Þessir háu herrar ætluðu sem sagt ekki að borga mér hluta af yfirvinnunni sem ég vinn núna fyrr en í janúar-febrúar! Ég bað um að þetta yrði lagað og það var vel tekið í það en leiðréttingin kemur þá auðvitað ekki fyrr en 1. nóv. &*%$# skíta jobb. Afsakið orðbragðið, en maður fer ósjálfrátt að tala svona þegar nemandi manns kallar mann ógeðslega hóru, ... tvisvar sinnum sama daginn.

Skapið lagast örugglega eftir nokkra daga, þetta er bara þetta venjulega mánaðarmótaþunglyndi.

Bíóferð

Við Ólöf skelltum okkur í bíó í dag sem er ekki í frásögur færandi, nema hvað, bíómiðinn öskraði á mig þegar ég fékk hann í hendur. Hverjum dettur þetta í hug? Ég spyr bara.

Ólöf missir fyrstu tönnina

Ólöf missti fyrstu tönnina sína í kvöld. Tönnin var orðin mjög laus og Siggi rétt kom við hana þá datt hún. Ólöf var mjög ánægð með þetta enda búin að bíða lengi eftir að missa tönn.

Við vorum með fjölskylduafmæli fyrir stelpurnar í dag. Það heppnaðist vel og stelpurnar fengu fullt af flottum gjöfum. Takk fyrir okkur. Þura og Guðmundur komu með litlu prinsessu, ohh hvað hún er æðisleg, ég missti mig aðeins í að taka myndir af henni.

Spaugstofan var frábær, mér fannst kennarabrandarinn sérstaklega skemmtilegur, lesblindur/lesbískur, hahaha

Ævintýraleg ljósmyndaferð

Við fórum 3 í ljósmyndaferðina á Þingvöll. Við fórum úr sól og blíðu heiman frá mér í hífandi rok og ískulda á Þingvöllum. Ingibjörg var samferða mér og við hittum svo Ástríði við kirkjuna.

Við tókum svolítið af myndum við kirkjuna og fórum síðan í Almannagjá. Þar var Ástríður svo óheppin að rífa vöðva og haltraði það sem eftir var ferðarinnar. Þar sem Ástríður átti í erfiðleikum með að stíga í fótinn var ákveðið að Ingibjörg myndi keyra bílinn hennar heim. Bíllinn bilaði hins vegar á leiðinni þannig að hann var skilinn eftir á Vesturlandsveginum á meðan við Ingibjörg keyrðum Ástríði á slysavarðstofuna.

Þetta var samt mjög skemmtileg ferð þó að haustlitirnir hefðu mátt vera meiri.

Ljósmyndaklúbburinn tekur til starfa

Fyrsta ferð ljósmyndaklúbbs Engjaskóla er á morgun. Ég vona að það rigni ekki eldi og brennisteini eins og í Laugavegsferðinni okkar Guðnýjar í dag. Það verður spennandi að sjá hversu margir mæta. Nú ef það verður rigning er ekki annað að gera en taka með sér glæra plastpoka til að setja utan um myndavélina.
Félagslífið fer vel af stað í vinnunni núna þetta haustið eins og venjulega. Haustferðin er ákveðin (mín er í nefndinni) og verður 5. október. Svo er auðvitað ljósmyndaklúbburinn og jafnvel einhver Photoshop hittingur (Ástríður þarf að fara að kenna okkur allt um Orton effect, Lomo og ég veit ekki hvað), og Guðný ætlar að skipuleggja sauma/prjóna/kjaftakvöld, það er nú bara skemmtilegt. Ætli Dagný setji ekki upp spennandi bíóferðir ... o.fl. o.fl. o.fl. Þessi vetur verður fljótur að líða eins og hinir 10 sem ég er búin að vera í kennslu. Vá getur það verið að það séu komin 10 ár síðan ég byrjaði að vinna í Engjaskóla!

Barnaafmæli í gær

Ólöf hélt bekkjarafmælið sitt í gær. Hér mættu 10 hressar og fjörugar stelpur úr bekknum og Ásta. Þetta var svaka fjör og ég þakkaði fyrir að afmæli koma bara einu sinni á ári. Nú ligg ég uppi í rúmi og hvíli mig, í eldhúsinu er enn allt í drasli eftir gærdaginn en það er svo gott með svona drasl að það fer ekkert þó að maður taki það ekki strax.

Þetta íslenskunám sem við Svala og Gerður erum að byrja í í Háskólanum á nú ekki eftir að láta okkur leiðast, leslistinn er endalaust langur og nýr fyrirlestur sem þarf að hlusta á tvisvar í viku í tölvunni. Fyrsta verkefninu á að skila á fimmtudaginn og sama dag fáum við næsta verkefni. Það fyndnasta er að aðalkennslubókin í þessu íslenskunámi er á ensku!

Nú er fermingarfræðslan að byrja hjá Þórunni. Það er messa bæði í dag og á morgun. Og foreldrar eiga að koma með. Ég er ekki alveg að nenna að fara svona oft í kirkju eins trúlaus og ég er nú.

Nýja fína frænka mín

Hér er hún komin stúlka GuðmundarogÞurudóttir. Til hamingju með prinsessuna elsku litla fjölskylda.

Mikið að gerast um helgina

Það var ýmislegt að gerast þessa helgi. Partý hjá Rúnu á föstudaginn, svaka stuð. Bæjarferð með Ólöfu á laugardagsmorgninum, Siggi í skólanum frá 10-4 á laugardaginn, golfmót fjölskyldunnar og mín var í 3. sæti ;-), partý í Starenginu á eftir á laugardeginum, aftur svaka stuð. Svo sund með Sigga, Ólöfu og Ástu í morgun. Þar hittum við Guðnýju og co. Þórunn hefur ekki sést um helgina, hún fór í sumarbústað með Sunnu og kemur seinna í dag.
Í morgun dró ég upp tölustafina og klippti þá út. Ekki svo seinlegt, svo plasta ég þetta á morgun.

Trúnaðarmaður ;-)

Já, já það er satt, mín er orðinn trúnaðarmaður fyrir kennarana í Engjaskóla. Fyrst fundurinn er á morgun. Við Elín, varatrúnó, förum saman í fyrramálið kl. 9 - 11. Ég held þetta verði ágætt. Einar sagðist myndi hjálpa til við að dreifa blöðum ef ég tæki þetta að mér, ég ætla að taka hann á orðinu og demba á hann Skólavörðunni í fyrramálið, hehe.
Guðný, Svala, Ingibjörg og ég fórum á kynningu fyrir handavinnukennara í Föndru í kvöld. Maður gæti nú alveg gleymt sér þarna í nokkra daga! Ég keypti mér pappír til að föndra tölustafi úr til að hafa í stærðfræðistofunni minni. Ég ætla að gera talnarunu frá 1 - 20 og jafnvel hærra og setja svo hring undir prímtölurnar. Mér finnst þetta svo frábært kerfi sem við vorum að taka upp í vetur með að faggreinaskipta kennslunni, þetta er miklu léttara og nú get ég gert allt mögulegt til að gera kennsluna meira líflega og skemmtilega því ég hef svo mikinn tíma.
Á morgun verður svo fyrsta partýið, jibbý.
Hið árlega golfmót fjölskyldunnar hans Sigga verður svo á laugardaginn, byrjar kl. 4 og endar svo á partýi, sem verður víst haldið heima hjá okkur ef ég hef skilið Sigga rétt.
Ég er búin að fá bókalista fyrir íslenskunámið mitt, en veit samt ekki ennþá hvenær það byrjar. Ég þarf endilega að muna að senda kennaranum póst og spyrja nánar út í þetta fjarnám.
Siggi ætlar líka að drífa sig í nám. Það er boðið upp á rafvirkjanám fyrir vélstjóra, aðeins 9 einingar í viðbót og þá er maðurinn orðinn rafvirki. Hann tekur 5 einingar í fjarnámi á haustönn og 4 á vorönn og byrjar á laugardaginn. Þetta verður upptekin fjölskylda í vetur!
Ólöf mín er byrjuð í skólanum og það hefur gengið mjög vel, en ekki eins vel að koma henni í gæsluna. Ég klikkaði auðvitað á því að byrja að tala um gæsluna um leið og ég byrjaði að tala um skólann í febrúar til að venja hana við tilhugsuninni. Það er ekki eðlilegt hvað hún á erfitt með að venjast nýjum aðstæðum. En nú er þetta allt komið held ég, hún fór allavega í gæsluna bæði fyrir og eftir skóla í dag. Ég sótti hana svo snemma í dag og við fórum aðeins í heimsókn á leikskólann. Hún var nú hálf feimin að koma þarna inn aftur eftir svona langt hlé.

Byrjuð að vinna

Ég byrjaði að vinna á miðvikudaginn. Það er nú alltaf ágætt að mæta aftur eftir sumarfrí þó ég hefði alveg getað hugsað mér að vera 2-3 vikur í viðbót í fríi. Ég er að fá nýjan nemanda í bekkinn minn, það er stúlka sem kemur frá Texas í Bandaríkjunum. Hún talar enga íslensku og ekki mamma hennar heldur. Pabbi hennar er íslenskur en hefur búið úti í 25 ár, talar litla íslensku en skilur hana vel. Mamman og stelpan komu í viðtal til mín á föstudaginn og ég talaði auðvitað við þær á minni "reiprennandi og lýtalausu" ensku, en það var svo skrítið að það var eins og þær mæðgur skildu mig svo illa! Ég hefði átt að spyrja bara "are you married?" eins og sumir hefðu gert ;-)

Við fórum í afmæli til Brynju og Bogga á föstudaginn, það var frábært. Þórunn var að passa og Ólöf var ekki alveg sátt, þannig að ég skrapp heim um kl. 10 til að koma Ólöfu í rúmið. Ólöf sofnaði svo upp úr hálf ellefu og ég sofnaði mjög skömmu síðar. Ég vaknaði svo um hálf eitt og dreif mig aftur í partýið, ég er svo mikil partýmanneskja, eða þannig!

Við fórum svo á tónleika á Miklatúni í gærkvöldi og enduðum daginn á flugeldasýningunni. Tónleikarnir voru mjög góðir og ég notaði tækifærið og tók myndir af flugeldunum með þrífætinum á tíma.

Og síðast en ekki síst ... ég keypti mér fartölvu í dag. Dell, Vostro, 1500. Vonandi frábær vél, sölumaðurinn sagði a.m.k. að ég yrði ekki svikin af þessari. Nú er batteríið í hleðslu, Gunnar er búinn að koma og græja þráðlausa netið fyrir mig (takk Gunnar) og svo vantar mig bara aðeins að tala við Magna, út af sottlu. Þá er allt klárt.

Mánudagur

Við komum í gær heim úr ferðalagi um Eyjafjörð. Við byrjuðum á að gista í sumarbústað á vegum Kennarasambandsins innan við Akureyri. Þetta var svo sem ágætur bústaður, rúmgóður og vel búinn í eldhúsinu. En dýnurnar í rúmunum og sófinn í stofunni var ónýtt! Það er ekki hægt að lýsa því neitt öðruvísi, óþolandi þegar maður borgar stórfé fyrir gistingu og fær svo óþægileg rúm. Dagskráin var þéttskipuð hjá okkur þessa fimm daga sem við vorum fyrir norðan. Við röltum um miðbæ Akureyrar, fórum á handverkssýninguna á Hrafnagili (mjög flott), fengum okkur súpu í heimahúsum á Dalvík á föstudagskvöldið, tókum þátt í Fiskideginum mikla á Dalvík á laugardeginum, Siggi fór tvisvar með krakkana að veiða á bryggjunni á Ólafsfirði og að lokum kíktum við á sveitamarkaðinn sem er beint á móti Jólahúsinu í Eyjafirði. Þar er hægt að kaupa ótrúlega gott brauð o.fl. Við komum heim í gær, það væri óskandi að hægt væri að komast á milli landshluta hraðar!
Í morgun fór ég svo upp á verkstæði að vinna, kom heim um hádegi, þá fórum við mæðgur í EJS að skoða fartölvur. Ég held að ég sé loksins búin að finna tölvuna "mína". Ég reyndi að kaupa hana en hún var uppseld og ég er á biðlista. Hún kemur í lok ágúst.

Bíll á umferðareyju

Þessi bílstjóri hefur keyrt aðeins of hratt, a.m.k. náði hann ekki beygjunni á hringtorginu við Engjahverfið/Víkurhverfið. Ég hló svo mikið að ég var viss um að allar myndirnar yrðu hreyfðar. Ég kom að þessu þegar löggan var að tala við strákinn (svona 17-18 ára). Stuttu seinna kom vinur hans og sótti hann og þeir brunuðu burt á öðru hundraðinu, þvílíkir hálfvitar, ég vona bara að þeir drepi engan!

Vantar kennara?

Í fréttunum í gær var talað um að nú væri ástandið í ráðningarmálum kennara ekki gott fyrir komandi vetur. Gott á fræðsluyfirvöld segi ég nú bara. Ekki veit ég af hverju yfirvöld eru að reyna að halda uppi menntun í þessu landi, ekkert má hún kosta. Þeir vilja örugglega helst ráða bara leiðbeinendur, það er ódýrast. Það verður forvitnilegt að fylgjast með umræðum um kjaramál kennara í vetur. Það eru margir kennarar að hugsa sér til hreyfings, þ.m.t. undirrituð.

Ég fór út að mynda í gær og fann þessa fínu lirfu. Henni finnst baldursbrár greinilega mesta hnossgæti, sjáið bara blómin vinstra megin við hana.

Skólagarðar

Við mæðgur fórum í skólagarðana í morgun. Það var nú alveg kominn tími til, því garðurinn var fullur af arfa. Við hjálpuðumst að að reyta arfann, taka upp og vökva. Stelpurnar urðu síðan eftir í garðinum og ég fór heim og hafði það huggulegt, settist út á pall í sólbað með góða bók. Ég er að lesa If you could see me now eftir Cecilia Ahern. Hún fjallar um strák sem á ímyndaðan vin. Mér finnst hún mjög skemmtileg.

Jarðaber og ströndin

Við erum að rækta jarðaber á pallinum hjá okkur. Ólöf sagði að nú þyrftum við aldrei aftur að kaupa jarðaber. Uppskeran er nú ekki svo mikil, við fáum eitt ber á 2-3 vikna fresti. Við fáum berin í þessari röð: fyrst fær Ólöf, svo Þórunn, svo ég og síðastur er Siggi. Við erum öll búin að fá eitt ber nema Ólöf er búin að fá tvö. Þórunn fær þetta sem er orðið rautt á myndinni.

Við mæðgur skelltum okkur á ströndina í Nauthólsvík seinnipartinn í dag. Þessi strönd er nú alveg frábær í svona góðu veðri. Stelpurnar tóku sundfötin með og ég sat upp við húsið og las.

Í bústað í Skorradal

Við vorum í sumarbústað með Guðnýju og Co um helgina í Skorradal. Við fengum mjög gott veður þó það væri ekki sól allan tímann. "Kallarnir" fóru með börnin að veiða. Það veiddist aðeins einn fiskur og Gunnar veiddi hann. Krakkarnir voru mjög áhugasöm þegar kom að því að gera að fiskinum. Þau fundu hjartað og fylgdust með því slá utan líkama fisksins. Þetta var skemmtileg helgi, við þökkum fyrir okkur.
Á morgun verður svo matarboð hjá mömmu með öllum ættingjunum frá Svíþjóð. Það verður skemmtilegt að hitta þau öll.

• Muna:
  -kaupa batterí fyrir myndavélina! Það gengur ekki að verða batteríislaus í miðri útilegu.
• Framundan:
  -Matarboð í Maríubaug, 30. júlí, með ættingjum frá Svíþjóð
  -Kaffihúsahittingur með Engjaskóla á Súfistanum 31. júlí kl. 13.
  -Akureyri og Ólafsfjörður, 8. - 12. ágúst. Heimsækja Ninnu og fjölskyldu, skoða fiskidaginn mikla á Dalvík og skoða handverkssýninguna á Hrafnagili
  -Vinnan byrjar 15. ágúst
  -Danskir dagar í Stykkishólmi 17. - 19. ágúst
  -Ólöf og Þórunn byrja í skólanum 22. ágúst

Ja hérna, Jóhanna farin að blogga líka!

Ekki veit ég hvort þetta tekst hjá mér, þ.e. að vera bloggari. En ég ætla að reyna. Tölvunördinn hún systir mín er með svo fínt blogg að mig langar að reyna þetta líka.