Heimsóknir yfir heiðina

Við lögðum land undir fót í dag og tókum meira að segja gesti með okkur. Við fórum fjögur og svo stóru börnin hennar Guðnýjar systur á jeppanum yfir Hellisheiðina. Ég var nú svolítið stressuð yfir þessu ferðalagi enda með eindæmum veðurhrædd þegar kemur að hættulegum fjallvegum. Ég útbjó okkur með nesti, hlífðarföt og teppi og sængur ef við skildum þurfa að bíða eftir björgun í köldum bíl! Þetta fór nú allt vel og við komumst heilu og höldnu báðar leiðir. Við gerðum meira að segja góðverk á leiðinni heim, kipptum í lítinn fólksbíl sem var fastur í skafli.

Ástæða ferðarinnar var annars vegar að skoða hvolpinn okkar hann Avatar á Selfossi og hins vegar að heimsækja Söndru mína og taka 5 mánaða myndir af krúttmolanum honum Bjarna Marel. Smá sýnishorn:

Þeir eru auðvitað báðir algjört æði þessir litlu strákar.

Hríðarmugga

 

Ég fór út að ganga "með hundinn" áðan. Þetta er fjórði dagurinn í röð sem ég dríf mig út í göngutúr eftir vinnu. Ég er sko að æfa mig. Veðrið var frábært, alveg logn og hríðarmugga. Það hlaut að koma að því að við fengjum snjó hér í höfuðborginni. Ég vona bara að það verði ekki ófært þegar SPK fer í bústaðinn eftir nokkra daga.

Við ætlum að skoða hvolpinn "okkar" um helgina og eins að heimsækja litlu fjölskylduna, sem er ekki svo lítil lengur, fyrir austan fjall.

Á mánudagskvöld kl. 20 verður svo opnunin á Fókussýningunni Veður í Fókus í Norræna húsinu. Allir velkomnir.

2 vikna hvolpar

Hvolparnir orðnir 2 vikna. Avatar er í miðjunni.

Hvolpurinn okkar

Avatar nýfæddur. Hann fæddist 7. febrúar og á tvö systkini.
Avatar 10 daga gamall. Hann opnaði augun 8 daga gamall.
Myndirnar eru frá Söru hvolpamömmu á Selfossi.
Við getum farið og skoðað um næstu helgi þá eru þeir orðnir 3 vikna þessar dúllur.

Vetrarfríið hefur verið notað til að taka til og breyta hér heima. Sjónvarpssófinn var orðinn of lítill fyrir okkur þrjár mæðgur, hvað þá þegar hundurinn kemur líka. Siggi er auðvitað alltaf eins og kóngur í ríki sínu með sinn eigin stól. Þannig að ég ákvað að færa sjónvarpið inn í stofu og nota stofusófana. Nú þarf ég bara að losna við græna sófann og klára að raða upp og gera fínt.

Þegar ég var að færa sjónvarpsborðið í gær (það er á hjólum en níðþungt) fór gúmmíið af einu dekkinu og gerði djúpan skurð í parketið (þetta er sko mjög langt frá því að vera rispa!). Ég ætla að athuga hvort Hjalli hennar Svölu hefur ekki eitthvert súpergott ráð við svona hörmungum.

hinn búningurinn

Bleiki pardusinn mættur á svæðið!

Fór á öskudagsráðstefnuna sem Menntasvið heldur árlega á þessum degi. Þetta var nú meiri tímasóunin, ég þoli ekki þegar er verið að draga mann á eitthvað sem er algjört kjaftæði. Við systur völdum okkur málstofu um lífsleikni og vorum að vonast eftir einhverjum góðum hugmyndum, en nei, nei það eina sem við fengum út úr þessu var að "rannsóknir sýna að það er nauðsynlegt að efla félagsfærni barna". Ég hefði nú getað sagt ykkur það!!!

Öskudagsbúningur í höfn

Öskudagsbúningurinn fyrir Ólöfu er tilbúinn. Það gekk nú ekki þrautalaust fyrir sig, ungfrúin hefur nú sínar skoðanir á málunum og var ekki alveg sátt við útfærslu saumakonunnar á outfitti Línu Langsokks, en þetta hafðist að lokum og sú stutta var sátt.

Ég saumaði æpandi bleikar leggings á unglinginn og skott í stíl, en hún ætlar að vera bleiki pardusinn, við eigum bara eftir að hanna eyrun!

Fórum að skoða hvolpa áðan

Fjörugur hvolpastrákur hjá Ólöfu.
Black og tan tíkin sem er frátekin fyrir annan.
Fjörugi hvolpastrákurinn sem við vorum voða skotin í.

En svo eru þessir:
http://islandica.123.is/page/27536/

Við förum í hundana

Við ætlum að fara í hundana. Þórunn hefur beðið um hund sl. 10 ár og loksins létum við undan. Það er von á goti um 10. febrúar og ef það fæðast tvær black/tan tíkur fáum við aðra þeirra (eins og sá þriðji í röðinni). Ef ekki tökum við ruby tík sem fæddist um áramót (eins og sá annar í röðinni).
Ég er orðin svolítið spennt og stelpurnar líka held ég. Þórunn hefur samt ákveðið að hún nenni ekki að fara með hundinn út á morgnana!