Eftir verslunarmannahelgi

 Eftir verslunarmannahelgi fer maður að detta í vinnugírinn, bara vika eftir af sumarfríinu. Ég er búin að vera dugleg að nota rigningardagana í að prjóna og nú áðan á þessu yndislega sumarkvöldi skrapp ég út í garð og tók nokkrar myndir.

 Það eru ekki nema svona 3-4 vikur í að litla ljósið hennar ömmu sinnar mæti á svæðið. Ég er sko farin að hlakka til, það er svo yndislegt að knúsa ungbörn.

 Bróðir minn og mágkona eiga líka von á barni og fengu að vita í sónar í dag að það er stelpa á leiðinni. Þegar ég er búin að prjóna fyrir ömmubarnið fer ég af stað með eitthvað krúttlegt fyrir litlu frænku.

 Mér finnst alveg nauðsynlegt að huga vel að smáatriðum, t.d. eins og þessar tréperlur á endanum á þessari húfu. Húfan er á nýfætt barn þannig að engin hætta skapast á því að barnið stingi perlunum upp í sig. Það þarf nú að reyna að hugsa fyrir öllu.

 Ég er að prjóna aðra svona sokka, einlita úr sama garni og peysan með laufunum og hvíta húfan.

 Sæta spætan vildi auðvitað ekki láta sitt eftir liggja og heklaði þetta barnateppi fyrir systurdóttur sína. Hún er búin að vera voða dugleg og lærði meira að segja krabbahekl fyrir kantinn.

Annars er ég himinlifandi eftir daginn þar sem hjólin á grindinni í uppþvottavélinni minni komu loksins í dag en ég er búin að vaska upp í nærri því 6 vikur í sumar og alveg búin að fá nóg af uppvaski í sumarfríinu mínu.

Aftur til hversdagsleikans

how do you make a gif at gickr.com
Ég kom heim úr húsmæðraorlofinu mínu til Ítalíu aðfararnótt þriðjudags. Ferðin var einu orði sagt dásamleg. Staðurinn sem við gistum flestar nætur á, lítið 300 manna fjallaþorp, Corfino, var eins og klipptur út úr póstkorti. Litlar götur, falleg hús, blóm alls staðar, yndislegt fólk. Hópurinn sem fór í þessa ferð var einstaklega vel samsettur og skemmtilegur en eins og allir vita er það ekki sjálfgefið.

 Þetta er umferðargata, maður þurfti að stökkva inn í dyragætt til að hleypa framhjá.

Þvottasnúrurnar voru almennt utan á húsunum og þar var engin feimni, stórar ömmunærur héngu við hliðina á handklæðum og borðdúkum.



Þetta er aðalfjallið, Pania di Corfino. Þorpið er í 840 m hæð yfir sjávarmáli og fjallið er annað eins. Við fórum ekki upp á efsta toppinn heldur í gegnum skarðið sem örin bendir á. Þetta var 10 km leið sem tók okkur um 5 klst með klukkutíma stoppi á barnum þarna upp (sem var því miður ekki opinn), hækkunin var um 600 m.

Í lok ferðarinnar tókum við E lest til Pisa og kíktum á skakka turninn. Það var stórkostleg upplifun. Turninn var stærri, marmarinn hvítari og hallinn meiri en ég hafði gert mér í hugarlund. Þá hefur enn eitt atriði bæst á listann hjá mér yfir merkilega staði í útlöndum sem ég hef séð með eigin augum. 

• San Marino smáríkið á Ítalíu, 1987.
• Feneyjar, Ítalíu, 1987 og 2000.
• Akropolis hæð í Aþenu, Grikklandi, 1990.
• Uffici safnið í Flórens, Ítalíu, 2000.
• Stonehenge, Bretlandi, 2003.
• Skakki turninn í Pisa, Ítalíu, 2012

Það er spurning hvað verður næst, mig langar að sjá Eiffel turninn í París, Frelsisstyttuna í NY og örugglega margt fleira.

Ferðin var sem sagt mögnuð upplifun og kemst engan veginn fyrir í þessum pósti. Hversdagsleikinn skall hins vegar harkalega á þegar heim kom, þrif, eldamennska, þvottur og annað slíkt sem tilheyrir heimilishaldi. En ég get yljað mér við minningar um hrikalega skemmtilega ferð.

Mynd á dag í júní

Nú er ég að byrja þriðja mánuðinn í ljósmyndaverkefninu "mynd á dag" sem áströlsk kona stendur fyrir. Ég byrjaði á þessu 1. apríl og náði að taka allar myndirnar í hverjum mánuði þó þær væru ekki allar teknar á réttum degi, ég var þó aldrei meira en þremur dögum of sein. Myndirnar má skoða í albúmum inn á Flickr síðunni minni.

Þema dagsins í dag er "empty". Morguninn fór í að taka til, þrífa og þvo þvotta. Það er alltaf gott þegar snúrurnar eru tómar en þær fyllast þó ótrúlega fljótt aftur. Kvöldið fer síðan í að fara yfir próf, ég er alveg að verða búin að fara yfir íslenskuprófið en á allt stærðfræðiprófið eftir.

Aðeins rúmar tvær vikur í dásamlegu Ítalíuferðina mína og E vinkonu. Ég var búin að leita í 5 búðum að góðum gönguskóm sem kosta ekki hálfan handlegg en gekk lítið fyrr en ég fór í nýju íþróttabúðina á Smáratorgi í vikunni. Þar fékk ég fína gönguskó, létta og góða sem passa fyrir innleggin mín á kr. 3990. Sem er auðvitað grín því skórnir sem ég var búin að skoða kostuðu frá 19900 - 38000 kr. Ég er líka búin að kaupa moskító fælu og sólarvörn, teygjubindi og hælsærisplástra. Hatturinn hins vegar vefst aðeins fyrir mér því mér verður alltaf svo heitt með höfuðfat. Stuttbuxurnar passa ennþá svo þetta er allt að smella saman.

Að prenta á efni

Ég er búin að vera með efnisprentun á heilanum undanfarnar vikur. Um daginn sá ég aðferð á pinterest.com sem ég ákvað að prófa en hún felst í því að prenta mynd með laser prentara á venjulegt A4 blað, hvolfa myndinni á efni (athugið að prenta spegilmynd) og nota málningarþynni (paint thinner) til að leysa upp litinn og nudda honum á efnið. Ég nennti ekki að leita að málningarþynni þannig að ég náði í acetonið og hugsaði með mér að málningarþynnir og naglalakkseyðir hljóti að vera nokkurn veginn sami hluturinn og það kom á daginn, þetta svínvirkar, maður þarf samt að nudda mjög fast ofan á blaðið og bleyta nokkrum sinnum með þynninum því hann er svo fljótur að gufa upp (og muna að hafa góða loftræstingu svo maður verði ekki ruglaður í kollinum). Þegar ég var búin að gera nokkrar prufur tók ég fram viskustykkin úr Söstrene Grene sem ég keypti um daginn og setti myndina og textann sem ég var búin að búa til í tölvunni á efnið.

Best er að líma efnið niður á borð og líma svo pappírinn niður á efnið. Það er nefnilega hægt að gera ótrúlega fínlega merkingu með þessari aðferð. Ég bætti svo smá útsaumi við, hjarta utan um heimilisfangið og æ-ið varð rautt. Ég geri ráð fyrir að þetta virki líka með litaprentun, en á pinterest var talað um að prentarinn yrði að vera laser því bleksprautuprentarar myndu láta myndina renna of mikið út.

En þetta er ekki eina aðferðin því ég prófaði líka að strauja Freezer paper á léreft og snyrta brúnirnar. Síðan er pappírinn/efnið sett í gegnum bleksprautuprentara sem prentar það sem maður vill á efnið. Þegar þetta er komið í gegnum prentarann er pappírinn rifinn í burtu og maður er með efni með prentuninni á.

Allt þetta varð til vegna þess að ég skoða pinterest.

Til hamingju með daginn kæru Íslendingar

Í dag fórum við á Árbæjarsafnið og röltum þar í stafalogni og blíðskaparveðri þó engin sól hafi sýnt sig. Við gengum á milli húsa og leystum ratleik sem safnið bauð upp á, fengum okkur kaffi í Dillonshúsi og nutum umhverfisins. Stelpurnar heilluðust af hænunum og gáfu þeim gras að borða. Heimasætan pantaði þessa ferð þar sem hún fékk vinnu á safninu við að búa til blómabeð og stíga.

Ég er búin að taka þátt í þessu ljósmyndaverkefni nú í júní en þá á maður að skila inn myndum á Flickr á hverjum degi í júní og verkefni dagsins í dag var technology eða tækni. Ég ákvað að nota ferðina og mynda gömlu tæknina á safninu.

síðasta helgi fyrir jól

Litla stelpan mín orðin svo stór :-) Svona var hún fín á jólaballinu í skólanum á föstudaginn.

Þessi síðasta helgi fyrir jól er alltaf svolítið annasöm, nóg að gera hjá öllum. Við erum búin að fara á tvö jólaböll þessa helgi, syngja í messu, skreyta jólatréð með ömmu S og afa H, skreyta jólatréð okkar, fara á fimleikaæfingu, kaupa 9 jólagjafir, pakka inn jólagjöfum, baða hundinn, þrífa hús og bíl og fara í bíó. Ég er samt örugglega að gleyma einhverju hehehe.

Jólasveinarnir sem mættu á jólaball Fjölnis voru heldur skemmtilegri en þeir sem mættu til okkar í skólann. Þessir voru greinilega alvöru!!!

Ég hlakka svo til að prófa linsuna sem ég fæ í jólagjöf, 28mm, f1.8. Það verður ekkert smá gaman að prófa hana. Þessar myndir eru teknar með 50mm linsunni minni og heimatilbúnu móti framan á henni, galdurinn er að stilla á f1.8 og þá koma hjörtun þegar maður stillir fókusinn aðeins úr fókus. Það kom meira að segja hjarta í glampann í augunum á ÓH, ótrúlega sætt.

Desember er annasamur mánuður

Fyrstu helgi í aðventu vorum við í laufabrauðsútskurði og þá höfum við alltaf piparkökumálun í leiðinni. Í þetta skiptið var ég búin að kaupa tilbúið piparkökuhús í Tiger og stelpurnar skreyttu það svona listilega. Það var svo ekki fyrr en í gær að við höfðum tíma til að setja það saman og stilla því upp í stofunni. Tinni hélt auðvitað að þetta væri sérstaklega fyrir hann og fékk sér bita áður en við gátum nokkuð að gert. Hann var auðvitað skammaður greyið og nú veit hann að það má ekki snerta þetta hús :-)

 Aðventumót Ármanns var haldið sömu helgi og laufabrauðið og Ólöf tók þátt í tveimur greinum. Hún hefur verið treg til að taka þátt þannig að við foreldrarnir vorum mjög ánægð með að hún skyldi fást til þess að taka þátt í tveimur greinum. Vonandi tekur hún þátt í fleiri greinum næst.

Þann 1. desember fór ég svo á jólaljósarölt með Flickr konum. Ég klikkaði auðvitað á því að hafa þrífótinn með mér þar sem mikið myrkur var, en það er ótrúlegt hvað ég náði þó lítið hreyfðum myndum miðað við að hraðinn var oft ekki meiri en 1/15.
TO DO listinn styttist stöðugt, ég sendi dagatölin frá mér í prentun í gær, tók upp jólaskrautkassann í dag og skreytti smá, svo þarf maður að fara að huga að jólagjöfum ... hvað það verður veit nú enginn!

Jólaverkin

Nú er ég að byrja á dagatölunum sem ég geri alltaf fyrir hver jól. Ég er búin að nota Publisher í þetta verkefni nú í nokkur ár, en publisher er einfalt og fljótlegt í svona vinnslu og maður getur breytt öllu sem maður vill breyta. Ég hugsa að ég noti prentþjónustuna hjá jola.is en þar pantaði ég jólakortin eftir vandlega verðathugun á netinu. Kortin komu í dag og ég er bara mjög ánægð með þau, fallegur frágangur og góð litvinnsla.

Logn

Fór út að ganga með hundinn áðan í æðislegu veðri. Uppáhaldsveðrið mitt er logn, uppáhaldsskapið mitt er logn, uppáhaldsfélagsskapurinn minn er logn. Ég held að ég sé ekki mikil félagsvera frekar svona einvera. Það er eitthvað svo mikill erill í vinnunni þessa dagana, börnin hávær, hávaði á kaffistofunni o.s.frv. sem minnir mig á það að það eru bara 17 kennsludagar eftir fram að jólafríi.

Tók þessa mynd fyrr í haust í Fókusrölti við Álafoss. Langar að fara aftur þangað, þetta er algjör perla, svo fallegt þarna. Við ætlum að halda jólafund SPK á kaffihúsinu við Álafoss núna fljótlega, er að vinna í því að finna góðan dag.

Nýr matseðill

Ég sá þessa hugmynd á einhverri blogsíðu núna um daginn, get engan vegin munað hvaða, nema þar hafði konan notað járnbökunarbakka sem bakgrunn og svo sett segul aftan á miðana. Ég hugsaði með mér að ég myndi vera í vandræðum með að finna stað fyrir bakkann, þannig að ég ákvað að minn matseðill færi beint á ísskápinn. Einfalt, ekki satt? Ég gerði auðvitað fullt fullt af miðum.

Á miðvikudaginn var alveg geggjuð þoka úti svo ég ákvað eftir þemadag nr. 2 að taka smá pásu áður en kennarafundurinn byrjaði og skjótast og taka myndir af þokunni. Ég fór nú ekki langt en var fegin að ég brá mér aðeins frá því ég var eins og sprungin blaðra eftir daginn.

Haustmyndataka af stelpunum

Við löbbuðum út að Korpu einn fagran haustdag nú í október til að taka myndir af börnunum. Stelpurnar voru voða stilltar að stilla sér upp og Tinni var forvitinn fyrst ...

... en svo varð hann órólegur og nennti ekki að vera í þessum leik lengur.

 

Þær systur náðu samt að hemja hann og ég náði ágætis myndum af þeim, sem verða m.a. notaðar á jólakort og dagatöl. Ég er byrjuð á dagatölunum en jólakortin verða að bíða betri tíma. Ég þarf líka að finna mér góða og ódýra prentþjónustu, ég var ekki alveg nógu ánægð með Háskólaprent sem ég notaði sl. haust, myndirnar urðu allt of dökkar og asnalegir litir hjá þeim.

Heimasætan orðin 16 ára

Fyrir 16 árum fæddist þessi yndislega stúlka, 11 merkur og 50 cm, lítil en sterk og dugleg. Hún hefur alltaf haft ákveðnar skoðanir á lífinu og lætur ekki vaða ofan í sig. Hún var skírð í höfuðið á ömmu Stellu, hennar fyrsta barnabarn og þær hafa verið góðar vinkonur alla tíð, Þórunn var ekki nema 9 eða 10 mánaða þegar hún gisti fyrst hjá ömmu sinni og hún hefur gist óteljandi sinnum hjá henni og finnst það alltaf jafnskemmtilegt.
Nú er hún komin í framhaldsskóla, á fullt af góðum vinum og gengur bara allt í haginn, ennþá lítil en sterk og dugleg.
Eftir nokkra daga fer hún í fyrsta ökutímann sinn. Ég hlakka til að fara með henni í æfingaaksturinn og allt hitt sem hún á eftir að taka sér fyrir hendur í framtíðinni.

Haustið er svo fallegur tími, allir þessir litir í náttúrunni, þessi kaldi ferski andvari, alla vega þegar ekki er rok og rigning. Ég skrapp í smástund út að mynda í vikunni, fór nú ekki langt, bara niður götuna mína. Það þarf ekki alltaf að leita langt yfir skammt. Haustlitirnir eru líka fallegir við bæjardyrnar.

Þetta er nú örugglega væmnasta færsla hingað til en maður verður svolítið mjúkur þegar fyrsta barnið manns verður 16 ára. Mér finnst þessi 16 ár hafa flogið hjá.

Tinni 6 mánaða

Tinni varð 6 mánaða sl. sunnudag og af því tilefni fórum við Þórunn með hann út á tún í gær og tókum myndir af honum. Hann er nú að verða ágætisfyrirsæta og er duglegur að horfa í myndavélina.

Nú fer alvara lífsins að bresta á, ég fer á morgun á námskeið í stærðfræðikennslu og svo byrjar vinnan fyrir alvöru eftir helgi. Mér finnst ég nýbyrjuð í sumarfríi en er samt þakklát fyrir mitt langa frí því sumir fá ekkert sumarfrí eða mun styttra en ég.

Það er svo leiðinlegt að sitja í bíl

Þokan á Holtavörðuheiði er alltaf söm við sig. Við fengum svartaþoku á leiðinni á Þórshöfn og svo aftur hálfum mánuði seinna á leiðinni á Ólafsfjörð. En svo undarlega vildi til að á leiðinni heim var ekki þoka!

Annars er ég eiginlega komin með ógeð á því að sitja í bíl, bílstjóri eða farþegi, skiptir ekki máli. Ég stillti trip mælinn í bílnum í fyrri ferðinni og keyrði 1580 km samtals, í seinni ferðinni var S alltaf að núllstilla tripmælinn þannig að ég tók bara saman vegalengdir á milli þeirra staða sem við fórum á en þá voru auðvitað ekki taldir þeir km sem keyrðir voru inni á hverjum stað. Í seinni ferðinni keyrðum við 1528 km + eitthvað smá í viðbót fyrir innanbæjarakstur. Þetta er því jafnmikil keyrsla á báða staði, báðar ferðir voru frá mið til mánudags.

Ég fór á gay pride gleðigönguna í dag í fyrsta skipti, ég er búin að ætla að fara í mörg ár en nú ákvað ég að drífa mig, sérstaklega þar sem Fókus ljósmyndaklúbburinn minn hittist þar til að taka myndir. Þessi ganga er algjört augnakonfekt fyrir ljósmyndara, litirnir og gleðin sem skín af hverjum manni er alveg óborganleg. Ég ætla að vinna nokkrar myndir (ég tók tæplega 500 myndir) og setja inn á Flickr á morgun.

Ó já og Tinni er 6 mánaða í dag, litla krúttið, verð að taka myndir af honum á morgun.

Myndataka

Við fórum yfir heiðina í gær að heimsækja sætu fjölskylduna og taka 10 mánaða myndir af Bjarna. Þau eru að endurnýja þakkantinn hjá sér þannig að Siggi hjálpaði Davíð að rífa gamla kantinn niður. Ólöf skemmti sér konunglega á trampolíninu með Birtu og svo kom Birta með okkur í bæinn og gisti. Það gekk bara mjög vel og þær fengu að horfa á mynd inni í herberginu hennar Ólafar og fóru soldið seint að sofa, hehehe

Ferðasagan - fyrri hluti

Fyrsta ferðalag sumarsins byrjaði á miðvikudaginn en þá lögðum við mæðgur af stað á litla vörtusvíninu með hundinn með okkur. Guðný og co fóru líka með okkur á sínum bíl. Við tókum þessu rólega enda með bæði hvolp og smábarn með í för. Við lögðum af stað rúmlega ellefu um morguninn og ókum í Borgarnes en þá var Lilja orðin svöng og við fengum okkur nesti í Skallagrímsgarði. Næsta nestisstopp var á Blönduósi og við vorum komin til Akureyrar rúmlega sex. Þar hittum við Guðmund, Þuru og Emmu Kristínu og fengum okkur að borða á Bautanum með þeim. Eftir það var haldið til Ólafsfjarðar þar sem við mæðgur gistum hjá Ingu en Guðný og co gistu í íbúð vinar.

Daginn eftir lögðum við líka af stað um ellefu og héldum til Akureyrar þar sem við stelpurnar fórum í búðarrölt en strákarnir fóru í fótbolta og tóku Lilju með sér. Þegar við vorum að fá okkur Subway í grasinu fyrir aftan staðinn komu Hulda og Rannveig skyndilega gangandi með börnin sín, en þær voru búnar að vera á norðurlandi í nokkra daga. Við héldum svo af stað upp úr tvö í áttina að Þórshöfn og vorum búin að ákveða að fara Sléttuna vegna þess að Hólaheiðin sem átti að vera búið að opna var ekki opin. Við keyrðum auðvitað í gegnum Húsavík og mikið er það nú orðinn fallegur staður, búið að útbúa miðbæinn þannig að hann var mjög túristavænn. Myndin hér að ofan er tekin þar. Við ákváðum að stoppa aðeins bæði á Kópaskeri og Raufarhöfn og ég verð að segja að Þórshöfn er nú heimsborg miðað við þessi tvö þorp. En mikið óskaplega er nú þessi Slétta löng! Við vorum ekki komin til Þórshafnar fyrr um kl. 7 á fimmtudeginum. Þegar hér var komið höfðum við keyrt 820 km, mest í sól og góðu veðri. Við komum okkur svo fyrir í kjallaranum í Lyngholti og höfðum það kósí um kvöldið.

Á föstudeginum hittum við Stínu og Katrínu í Kaupfélaginu og hvöttum Katrínu til að taka þátt í "Ljósmyndamaraþoni Kátra daga og Canon 2010" sem ég, Guðný og Guðrún María tókum þátt í. Daginn eftir kom svo í ljós að af 10 keppendum hafði ég lent í 1. sæti og fékk Canon Ixus 105 í verðlaun, Katrín hafði lent í 2. sæti og fengið Canon fjölnota prentara í verðlaun og Guðrún María lenti í 3. sæti og fékk Canon ljósmyndaprentara í notkun. Umsjónarmaður maraþonsins var Kerly Ilves frá Eistlandi en hún var á Þórshöfn í hópi SEEDs-liða sem planta trjám og sinna fleiri verkefnum.

Nú þegar þetta er skrifað er Ólöf á balli í Félagsheimilinu Þórsveri, Þórunn er búin að mála sig og gera sig klára fyrir unglingaballið á eftir, og ég er búin að kaupa miða á fullorðinsballið sem byrjar um miðnætti.

So far hafa allir skemmt sér konunglega þrátt fyrir að það hafi byrjað að rigna á fimmtudagskvöldið og það rignir enn þrátt fyrir sólarspá fyrir daginn í dag. En eins og Guðný segir, það hefur enginn dáið úr rigningu ennþá en maður getur fengið húðkrabbamein af sólinni. Svo við erum sátt. Tinni hefur verið með okkur í þessu öllu og staðið sig vel.

Hellisgerði í Hafnarfirði

Fyrsta formlega lautarferð sumarsins var í gær. Við fórum (að vísu án Þuru og Emmu) til Hafnarfjarðar og gengum aðeins um miðbæinn og gömlu göturnar þar fyrir ofan og slefuðum yfir fallegu húsunum þar. Ég er búin að finna draumahúsið, það stendur við Austurgötu 37 og er guðdómlega fallegt að utan og örugglega ekki síðra að innan. Þegar slefrúntinum var lokið héldum við að Hellisgerði sem er ævintýralegur garður. Þar tókum við upp nesti og höfðum það huggulegt.

Við fórum á svefntímanum hennar Lilju og hún átti að sofa á meðan við gengum um bæinn, en sú stutta ætlaði sko ekki að missa af neinu og vakti allan tímann og naut þess í botn að vera með okkur, rölta um bæinn og garðinn, fá sér af girnilegu nestinu og njóta lífsins.

Smá uppstilling hjá sætu systrunum.

og svo líka hjá frænkunum fallegu. Við fengum yndislegt veður í þessari ferð og lautarferðir eru svo sannarlega mál málanna núna. Það þarf ekki að fara langt eða kosta mikið til að njóta lífsins í góðum félagsskap.

Lautarferð á pallinum

Fyrsta lautarferð sumarsins var haldin á pallinum hér heima í gær. Þórunn kom með tvær vinkonur sínar, ég bauð mömmu, Ólöf kom með tvær vinkonur sínar og Anna og Gísli kíktu við. Þórunn hafði pantað regnbogaköku og ég tók pizzuslaufur úr frystinum. Allt voða huggulegt í góða veðrinu. Við ætlum síðan að reyna að fara næstu lautarferð til Hafnarfjarðar í byrjun vikunnar.

Alltaf gaman að ná fólki þegar það er að borða, hehehe

Tinni varð 5 mánaða í vikunni og af því tilefni vorum við Þórunn með smá myndatöku af kappanum. Við erum búin að fara 7 sinnum á hvolpanámskeiðið og Tinni stendur sig afskaplega vel. Hann ætlar að verða hinn ljúfasti hundur. Ég lenti nú í smá klípu í síðustu viku þegar ég tók að mér að passa pug fyrir frænku hans Sigga. Þeim kom ekki vel saman, vægt til orða tekið, reyndu stanslaust að nauðga hvor öðrum og puginn hafði ekki fætur heldur gorma og fínu girðingarnar okkar voru engin fyrirstaða. Hann strauk tvisvar og það var eins og ég væri að passa ungabörn, ég gat ekki litið af þeim eitt augnablik, úff þetta var ekki mjög skemmtilegt.