þriðjudagur til þrautar

Jæja nú er ég alveg að verða góð eftir veikindin, eiginlega alveg hætt að hósta, engir beinverkir eða hausverkir og næstum ekkert hor. Tók bara viku, vel sloppið!


Ég var að leika mér smá í PS í gærkvöldi og tók fyrir mynd af Þórunni sem var tekin inni í herberginu hennar.




Ég kroppaði hana, notaði sepia tint action, clonaði út gluggakistuna og setti svo áferð á hana og hér er árangurinn.

Ég lenti í alveg stórskemmtilegu símtali við eitt foreldri í dag. Og fékk ennþá skemmtilegra tölvubréf frá öðru í gær. Kemur mér alltaf á óvart hvað sumir þekkja börnin sín illa, eða eru haldnir einhverri meinloku um að það megi ekki skamma börn fyrir óþekkt. Minnti mig á þáttinn með Dr. Martin frá því í síðustu viku. Eða mömmu hans Emils þegar hún sagði við Línu "En hann Emil er góður strákur, mundu það Lína". Hvernig eiga börn að læra muninn á réttu og röngu ef enginn segir neitt?

Þórunn mín er á árshátíð skólans í kvöld. Ég hélt að hún myndi fara í fermingarkjólnum, en nei ekki til að tala um. Hann vill hún nota í fyrsta skipti á fermingunni sjálfri. Hún fór í kjól sem ég keypti á útsölu í Hagkaup þegar hún var 7 ára og kostaði 500 kr. Það er nú ekki hægt að segja að hún sé dýr í rekstri þessi elska.

Raunasaga röndóttu vettlinganna

Í fyrrasumar keypti ég mér mjög fallega ullarvettlinga á sveitamarkaði í Hvalfjarðarsveit og hugsaði mér gott til glóðarinnar þegar færi að kólna. Í október fórum við í Litla ljósmyndaklúbbnum í fyrstu ljósmyndaferðina, veðrið var "skítkalt" (afsakið orðbragðið) og vettlingarnir góðu auðvitað teknir með og notaðir óspart í ferðinni milli skota. Eins og margir vita varð þessi ferð ansi stutt í annan endann því Ásta reif vöðva í kálfa og við snöruðumst með hana og bilaða bílinn hennar beint á slysó. Þegar ég kom heim uppgötvaði ég að vinstri vettlingurinn var horfinn. Hann liggur sennilega í góðu yfirlæti á þingstaðnum forna. Ég nennti auðvitað ekki austur að leita og ákvað að nota snilligáfu mína í prjónaskap og prjóna bara einn vinstrihandarvettling í stíl við hinn. Brilljant hugmynd fyrir svona brilljant konu eins og mig! Ég fór strax í Hagkaup í Spönginni og verslaði léttlopa í fimm litum og byrjaði þegar heim var komið, nokkur næstu kvöld greip ég í prjónana og þegar ég var kominn framyfir þumalmerkið sá ég mér til mikillar gremju að ég hafði notað of litla prjóna og vettlingurinn var miklu minni en hinn upprunalegi. Þá missti ég auðvitað áhugann hið snarasta og lagði prjónunum þangað til í fyrrakvöld er ég tók þá upp aftur, kláraði þennan hálfa og gerði annan jafnstóran á móti. Svo í gærkvöldi fékk ég mér grófari prjóna í hönd og byrjaði á vettlingnum sem átti að koma í stað þessa sem týndist. Þegar ég var rúmlega hálfnuð með hann sá ég mér til mikillar ánægju að nú var ég með rétta stærð af prjónum. Ég dreif því í því að klára hann (sat til 12:40 í gærkvöldi) og í kvöld faldi ég alla 34 endana á þessum síðasta vettlingi, algjörlega tilbúin að ráðast í þumlana og klára málið. Mér til skelfingar sá ég að nýi vettlingurinn var líka á hægri hönd, ég hefði getað grenjað!!! Nú er stóra spuringin, á ég ekki bara að henda þessum upprunalega og prjóna annan á móti hinum nýja eða á ég að reyna að leggja vettlinginn til þegar ég þvæ hann og gera hann að vinstri vettlingi! Ég meina er það hægt? Er það ekki eins og að reyna að afhomma einhvern?

Ég tók mynd af ósköpunum en myndin vildi ekki hér inn fyrr en í þriðju tilraun, skrítið!!

Fyrir og eftir

Fyrir og eftir,
originally uploaded by Jóhanna H.

Fyrri myndin er tekin 7. febrúar en seinni er tekin 15. febrúar.

Er komið vor?

Svei mér þá ef vorið er ekki að brjótast út úr snjónum og klakanum. Það var líka alveg kominn tími til.
Það hefur nú ýmislegt gerst í vikunni, t.d. var hin árlega árshátíð skólanna á föstudaginn í fárviðri, en við létum það ekki stoppa okkur. Svo fórum við hjónin á Maritas fræðslu í skólanum, ég fór á SPK kvöld og síðan átti Siggi auðvitað afmæli og hingað hópuðust þó nokkrir gestir þó ekkert formlegt afmælisboð væri. Við 3 í litla ljósmyndaklúbbnum hittumst svo í morgun og prófuðum nýju stúdíóljósin sem IH fékk að kaupa fyrir skólann. Og nú er Ólöf mín orðin lasin, hún gubbaði og er mjög slöpp, sefur bara.

Prjóni ... prjóni ... prjóni

Haldiði ekki að hún Ólöf mín sé bara búin að læra að prjóna. Hún er svo spennt að hún tók prjónana með sér í skólann í dag.

Nú ætlum við 3, ég, E og G að fara á prjónanámskeið á laugardaginn í Nálinni. Við ætlum að læra að prjóna tvo hluti í einu á sama hringprjóninn. Hljómar spennandi.

Hvað er þetta með snjóinn? Það spáir brjáluðu veðri annað kvöld, ætli það þurfi ekki að fresta árshátíðinni! Þetta var útsýnið út um þvottahúsgluggann í dag.

Tilraunir, tilraunir

ooohhhh mér finnst svo gaman að leika mér í Photoshop. Ég fann síðu á Flickr sem er með svona áferðir, þ.e. myndir til að setja yfir venjulegar ljósmyndir til að búa til gamaldagsáferð á þær. Hér er ein:

Frábært að hafa svona tvö áhugamál sem smellpassa saman :-)

Og handavinnan passar eiginlega við þetta líka því ég tek myndir af því sem ég geri og safna á sérstakan stað.

Febrúar verður nú soldið bissí hjá mér: fundur vegna komandi kjarasamninga, SPK, árshátíð, prjónanámskeið, afmælisboð hjá Söndru, vetrarfrí, afmælið hans Sigga, prjónakaffi, þorraboð hjá fjölskyldunni hans Sigga ...

Norðurljós

Þessi mynd er tekin í gærkvöldi. Ég labbaði bara austan við nýja fótboltavöllinn við Egilshöll.

asdfjklæ

Við vorum að ræða það á kaffistofunni í gær í vinnunni að fingrasetning á lyklaborð er líklega það sem hefur nýst okkur best af því sem við lærðum í menntaskóla.

Ég er búin að vera svo löt undanfarið, löt að taka myndir, löt að æfa mig í Photoshop, löt að elda, löt að þrífa, bara löt ... En nú er sólin farin að skína meira á hverjum degi og vonandi fer það að hafa áhrif. Ég var smá dugleg áðan, tók allar myndirnar af fjölskyldumyndaveggnum og þreif þær og vegginn líka. Rykhreinsaði meira að segja ofninn undir myndunum. Það er svona þegar sólin skín inn um gluggana þá sést allt rykið og þá getur maður ekki annað en náð í tuskuna.

Á mánudaginn ætla ég í Beco og kíkja. Kannski eyði ég einhverju af afmælispeningunum mínum.

Við Ólöf gengum á alla glugga í húsinu í morgun og þurrkuðum bleytu úr þeim. Það er svo mikið frost að gluggarnir sagga allir. Sum opnanlegu fögin voru frosin aftur, ég notaði auðvitað kraftana og ýtti einum þeirra upp og eyðilagði stormjárnið í leiðinni. En ég fór bara í Húsasmiðjuna, keypti nýtt og skipti um.