Total makeover hjá sætu spætu

Við byrjuðum að taka herbergi sætu spætunnar í gegn um páskana. Ég var nú smá upptekin við að klára margmiðlunarnámið þannig að ég kláraði ekki að mála húsgögnin fyrr en núna í vikunni. Við seldum Tromsö háa rúmið hennar með skrifborði undir og keyptum krúttlegt hvítt Ikea járnrúm í staðinn og gamalt furuskrifborð.

Sú sæta vildi endilega mála skrifborðið fjólublátt en þar sem mér finnst fjólublátt vera ljótasti litur í heimi, sagði ég við hana að það væri of mikil vinna að mála skrifborðið upp á nýtt þegar hún fengi leið á fjólubláa litnum og sagðist ætla að mála litlu skúffurnar fjólubláar og keypti svo krúttlegar höldur í Snúðum og snældu.

Ég verð nú að segja að þrátt fyrir fjólubláa litinn þá finnst mér þetta bara vel heppnað makeover. Og ekki nóg með það heldur var þetta svolítið grænt makeover þar sem við keyptum "nýju" húsgögnin notuð. Við komum nokkurn vegin út á sléttu svo ekki er hægt að kvarta yfir kostnaði.

Lífið er of stutt til að vera í leiðinlegum fötum

Fyrr í vetur keypti ég þennan langermabol í Vero Moda með það fyrir augum að breyta honum eins og Sachiko í Tea Rose Home gerir. Í kvöld kom ég mér loksins að verki, klippti ermarnar af og notaði til að skreyta.

Ermarnar klippti ég svo í ræmur eftir að ég hafði opnað þær og klippt alla sauma af.

Planið var að gera nokkrar rósir og nokkrar rendur með rykkingum. Ég fékk 8 lengjur úr ermunum.

Ég byrjaði á því að rykkja nokkrar lengjur með stóru spori á saumavélinni.

Ég saumaði fyrst rykktu lengjurnar, sneri svo upp á 5 lengjur og bjó til rósir. Lengjurnar saumaði ég á með mjóu, gisnu sikksakki. Rósirnar lagði ég á og festi með títiprjónum og saumaði síðan yfir tvær umferðir með beinu spori.

Bara ánægð með þetta, kemur vel út, sérstaklega þegar maður dregur inn magann fyrir myndatökuna.

Freezer paper

Ég er búin að vera með hugmynd í kollinum í smá tíma og fyrir nokkrum dögum ákvað ég að skella mér í verkefnið á SPK fundi. Ég tók gamlan, ljótan taupoka og ákvað að nota ammrískan freezer paper sem Systa frænka sendi mér frá Ammríku fyrir nokkrum árum. Þá var bara málið að finna skemmtilegt mynstur til að setja yfir ljótu merkin sem voru óþarflega stór að mínu mati og voru auk þess staðsett báðum megin.

Ég ákvað að gera gras yfir langa merkið. Fyrst teiknaði ég á pappírinn með blýanti, síðan skar ég mynstrið út með föndurhníf.

Svo þurfti að stilla þetta af miðað við merkið. Stensillinn er svo festur á með straujárni, en pappírinn er plasthúðaður og plastið bráðnar ofan í efnið við straujun.

Svo notaði ég Duncan föndurliti til að mála inn í stensilinn. Þegar búið er að mála er stensillinn fjarlægður og þótt furðulegt megi virðast er ekki vottur af plastinu frá pappírnum á efninu.

Þá var það hin hliðin og merkið á henni var jafnvel ljótara og því miður enn stærra. Það var því úr vöndu að ráða hvaða mótiv ætti að verða fyrir valinu. Ég er nú soddan sauður að kindamótiv heilla mig alltaf svolítið. Ég átti líka silfurlitan fatalit sem ég ákvað að nota sem aðallit, silfursauðurinn var að fæðast.

Silfurmálningin var lengi að þorna þannig að ég tók smá pásu og hélt áfram daginn eftir. Það þarf sér stensil fyrir hvern lit.

Silfursauðurinn tilbúinn en mig langar samt að bæta smá útsaumi við, t.d. strá út úr munninum á honum eða blóm á grasið hinum megin. Sé bara til hvað gerist.

Mér fannst þetta nú heppnast ótrúlega vel þó ég segi sjálf frá því ég er handónýt í því að teikna.

Basil og baunir

Smá DIY verkefni hérna rétt fyrir páska, ég keypti ódýra leirpotta og tók fram kalklitinn minn, skellti málningarlímbandi á pottana til að afmarka svæðið, málaði eina umferð yfir, lét þorna, skrifaði á með blýanti, setti mold, sáði basil og baunum. Nú bíð ég spennt eftir uppskerunni.

Girnilegu páskaeggin okkar, þarna vantar samt tvö egg nr. 4 sem stelpurnar fengu hjá mágkonu minni fyrir páskana. Sæta spætan fékk fjögur egg, heimasætan fékk þrjú og húsmóðirin eitt, hr. Galinn ákvað að fá sér ekki páskaegg þetta árið en fékk smakk hjá okkur.

Eruð þið ekki að grínast með þennan snjó? Það er allt hvítt eins og á fegurstu jólanótt og á morgun er 1. maí! Ég hélt að það væri óhætt að óska fólki gleðilegs sumars í gær en ég hef beðið með það út af snjóþyngslum en svo var bara allt hvítt í morgun og hefur snjóað stanslaust í allan dag. Þetta er nú alveg orðið gott í bili.

Blúndur

Mikið var ég glöð hvað sjónvarpið var með ömurlega dagskrá í kvöld. Ég drattaðist upp úr sófanum og framkvæmdi hugmynd sem ég hef séð á nokkrum bloggsíðum undanfarið.

Ég byrjaði á að finna alla blúndudúkana mína, suma hef ég prjónað, aðrir eru heklaðir dúkar frá ömmu heitinni og nokkra hef ég keypt í gegnum árin í Kolaportinu.

Ég setti heitt vatn í skál og setti 3 dl af sykri út í, hrærði vel þar til sykurinn var uppleystur.

Svo bleytti ég vel í dúknum, vatt mesta vatnið úr og ...

... strekkti yfir glerskálar. Nú þarf bara að bíða þar til á morgun til að athuga hvort þetta hefur heppnast. Aðalspurningin er hvort ég setti nógu mikinn sykur til að dúkarnir harðni almennilega. Kosturinn við að nota sykurvatn frekar en veggfóðurslím er að ef maður fær leið á skálunum og vill fá dúkana sína til baka, þá þvær maður bara sykurinn úr og leggur dúkinn flatan til að þorna.

Árshátíð yngsta- og miðstigs var í vikunni í vinnunni. Ég slapp ótrúlega vel frá þessu þetta árið, en enskukennarinn tók að sér að skipuleggja og æfa leikrit á ensku með 6. og 7. bekk. Ég sá um að sauma búninga (lítið mál) og svo var ég beðin um að sauma einn lax sem tókst bara þokkalega. Ég var því alveg sultuslök í lok árshátíðarinnar.

Kostnaður við myndavegg

Myndaveggurinn minn var nú ekki dýr framkvæmd.

• 2 dósir litaprufa stofn1-5362   kr. 762 (Grágræni liturinn á vegginn)
• Málningalímband 36mm breitt  kr. 1000 (extra breitt til að afmarka ferhyrninginn)
• Límtré fura 30x120cm, rist eftir endilöngu og límt saman kr. 2975 (hillan fyrir ofan ofninn)
• Hilluvinklar 4 stk á kr. 153. Samtals kr. 612 (það var líka hægt að fá næstum eins vinkla fyrir 980 kr stk. Borgar sig að skoða vel í hillurnar)
• Spreybrúsi með hvítri málningu fyrir ramma kr. 1222
• Fann prufudós síðan 2003 inni í skáp með antikhvítu sem ég notaði líka á rammana.
• 3 stk myndakarton fyrir stóru rammana kr. 3620
• Samtals fyrir "project restyle" kr. 10.191

Það þarf ekki alltaf að kosta stórfé að gera huggulegt í kringum sig og um að gera að nýta það sem hægt er að nýta. Svo er það auðvitað umhverfisvænt að nýta áfram það sem til er.

Hundkvikyndið á afmæli næsta mánudag, orðinn eins árs kappinn.

Tilbúið

Í síðustu viku fékk ég lánaðan myndvarpa í skólanum til að framkvæma leynitrikkið á nýja myndavegginn. Fattaði það eftirá að það hefði verið mikið auðveldara að fá skjávarpann lánaðann sem ég er með í stofunni minn.

Ólöf hjálpaði auðvitað til að mála og stóð sig mjög vel í þessu vandaverki.

Byrjuð að raða myndarömmunum niður til að negla á vegginn, búnar að mála.

Ég veit að það er flottara að nota vinil límmiða en þessi leið er ódýrari og minna vesen en að finna einhvern til að búa til límmiðana fyrir sig.

Myndirnar á leiðinni upp á vegg, Ólöf hjálpar til.

Þetta smákemur.

Allir rammarnir komnir upp, vantar samt myndir í suma þeirra. Ég er nú alveg með á hreinu hvaða myndir eiga að fara í suma rammana en þarf að sjá til með aðra.

Og svo ein mynd í lokin af veggnum eins og hann var í byrjun. Ég er bara mjög ánægð með þetta fyrsta "project restyle" verkefni ársins 2011.
Ég hef ákveðið að fara í nammifrí í febrúar, er að vonast eftir því að standast það. Því fleiri sem ég segi frá því, því meiri þrýstingur.

Sígur á seinni hlutann

Nú eru allir rammarnir orðnir hvítir, þeir síðustu voru málaðir í vikunni. Næsta skref er að finna til myndir í uþ.þ.b. helming rammanna, sumar myndir nota ég áfram frá gamla veggnum en svo ætla ég að setja nýjar líka.

Nóg af römmum, hlakka til að fara að raða þeim á vegginn.

Ég ætlaði nú ekkert að sýna meira fyrr en þetta væri tilbúið en svo fór ég að skoða gömul blogg og sá að síðasta færslan sl. 3 ár í janúar var þann 27. þannig að ég gat ekki annað en sett smá færslu núna.

hálfnað verk þá hafið er

Myndaveggurinn áður en hafist var handa við "project restyle". Planið var að búa til ferhyrning í grágrænum lit undir myndirnar, setja hillu yfir ofninn, mála alla rammana hvíta og leynitrikkið ....

Búin að taka alla rammana og þá kom í ljós hvað veggurinn var illa farinn. Það hefur ekki verið málað þarna í 7-8 ár og það kemur mikið ryk út af ofninum en hann er alltaf sjóðheitur enda eini ofninn í holinu.

Búið að taka allar myndirnar úr römmunum, hmmm látið bara eins og þið sjáið ekki rykið.

Að spartla og þrífa vegginn undir málningu.

Byrjuð að mála, nota yfirleitt bara litlu rúlluna í svona smáverk.

Nota alltaf þetta snilldarráð þegar ég mála, þ.e. set málningarbakkann inn í plastpoka, þá þarf ekkert að þvo bakkann á eftir, bara að henda pokanum.

Jæja, það er að komast mynd á þetta smátt og smátt, hillunni stillt upp með bókum til sjá hvernig þetta kemur út. Næsta skref að mála hilluna og síðan rammana.

Málaði hilluna með kalkmálningunni góðu sem ég keypti í fyrrasumar, hún gefur svona gamaldags veðrað útlit.

Hr. Galinn setti hilluna upp í kvöld og ég byrjaði að mála rammana, búin að fara eina umferð á fimm ramma, slatti eftir, þetta gæti tekið tíma.