Haustið

Loksins kominn tími á nýja færslu, ég er búin að vera ótrúlega löt að blogga í sumar, gaf mér einhvern veginn aldrei tíma til þess þó ég hefði nægan tíma. Það urðu smá breytingar á heimilishögum hér í síðustu viku en þá flutti hundurinn Tinni að heiman og settist að hjá góðu fólki í Vestmannaeyjum. Þar veit ég að honum á eftir að líða vel því á því heimili eru bæði fleiri dýr og fólk sem nennir meiri útiveru en ég og dætur mínar elskulegar.

 Þarna eru þau saman síðasta kvöldið hans Tinna hér heima. Þetta var sama dag og við héldum upp á afmæli sætu spætunnar. Hún er svo flink í höndunum og tók að sér að greiða frænkum sínum í afmælinu, setti í þær hringfléttur.

Svo fínar frænkur.
Nú þegar ég er orðin hundlaus kona gefst tækifæri til að fara með myndavélina í göngutúr og það gerði ég einn fagran haustdag í vikunni. Náttúrufegurðin hér í kring er engu lík og ekki þarf að ganga langt til að finna haustlitina.

 Einmana lúpína, þetta var sú eina sem var enn í blóma.

Nú skal ég verða duglegri að setja eitthvað inn á bloggið, ég lofa ...

Það fer að birta

Ég fékk svolítinn pening í afmælisgjöf um daginn og ákvað að nota hann til að kaupa mér nýtt veski. Fyrir valinu varð þessi fallega leðurtaska frá Drangey sem ég fór og keypti í dag. Ég var með valkvíða því töskurnar eru hver annarri fallegri. Eftir æsilega kosningu á fb ákvað ég að taka þessa.

Í svartasta skammdeginu er ekkert annað til ráða en að fara eftir þessu heilræði, reyna að sjá töfrana í hversdagsleikanum, sem er einmitt efni bíómyndarinnar sem ég horfði á um daginn "about time". Yndisleg mynd um það að njóta augnabliksins á hverjum degi. Mig langar að horfa aftur á þessa mynd fljótlega.

Við sæta spæta skelltum okkur á kaffihús í dag en það finnst henni alveg æði. Þessi staður er í uppáhaldi hjá henni núna en þar á undan fannst henni mjög fullorðins að fá sér krakka-frappó á te&kaffi.

Vinkona sætu spætunnar var í heimsókn í dag og við ákváðum að prófa að gera varalit eins og hú sá á youtube. Innihaldið er einn Crayola vaxlitur og 1,5 tsk af kókosolíu. Þetta er brætt saman yfir vatnsbaði (vægur hiti) í smá stund, hellt í litla krukku og látið kólna. Liturinn kemur ekkert voða mikið í gegn þegar maður notar hann en áferðin er mjúk og góð.

Ári eldri

Ég er þakklát fyrir afmælisdaga, gaman að fá fjölskyldu og vini í heimsókn. Dæturnar voru sætar í sér, sú yngri gerði skemmtilegt myndband fyrir mig og gaf mér ávísun á dekur og sú eldri og kærastinn gáfu mér hvítvín og kælifötu. Ég bíð spennt eftir prjónuðu afmælisgjöfinni frá systur minni sem er alveg að verða tilbúin. Bróðir minn og hans fjölskylda komu með fótakrem sem verður örugglega mikið notað þegar ég tek út dekurgjöfina frá þeirri yngri. Mamma og pabbi færðu mér peninga sem ég er næstum búin að ákveða hvað verður keypt fyrir. Tengdó komu með með fallegan blómvönd. Ég gaf sjálfri mér þennan vasa sem er á myndinni. Góður dagur þó veðrið hafi haldið sumum gestunum heima.

Framundan er nýtt og spennandi ár, uppfullt af venjulegum atburðum og vonandi líka fullt af nýjum og óvæntum atburðum, ég elska breytingar, að takast á við eitthvað nýtt og spennandi.

þriðji

Þriðji sunnudagur aðventu að kvöldi kominn, allir sofnaðir og kyrrð og ró yfir mér og friends sem rúlla í sjónvarpinu. Í dag var merkilegur dagur, litla óskastjarnan, þriðja ömmubarnið mitt fékk nafnið sitt. Heimasætan og kærastinn sungu í kirkjunni og tókst það líka svona ljómandi vel. Hvernig er hægt annað en að dást að þessu unga, hæfileikaríka fólki. 

Mágkona mín og bróðir eignuðust dóttur í kvöld. Mágkona mín á líka afmæli í dag svo hún fékk risastóra afmælisgjöf þetta árið. Ég hlakka til að hitta nýju frænku mína á morgun.

Veðrið hefur verið svo fallegt og jólalegt undanfarið, það snjóar í logni og alls staðar er umhverfið eins og á póstkorti, drifhvítur snjór yfir öllu, stillt veður og dásamlegt. Nú nálgast útskrift heimasætunnar óðfluga, undirbúningurinn mjakast áfram. Þetta gengur allt saman þegar allir hjálpast að.

Gleðilegt sumar

Gleðilegt sumar. Góður dagur í dag, 60 dagar í Ítalíuferðina, 10 dagar í að Borgó námið mitt klárist, allt á lokasnúningi þar og gengur framar vonum.

Hamingjuóskir til litlu systur, sem á afmæli í dag. Ég skulda henni afmælisgjöf en hún kemur um leið og um hægist hjá mér.

Við tókum grænt makeover á herbergi sætu spætunnar um páskana. Við seldum skrifborðið undan háa rúminu hennar fyrir 10.000 kr og keyptum venjulegt rúm í staðinn á bland.is fyrir 10.000. Svo seldum við háa rúmið á 6000 kr. með dýnunni sem fylgdi með venjulega rúminu, því hún vildi halda sinni dýnu, og keyptum skrifborð á bland.is fyrir 5000 kr. Það þurfti að mála einn vegg með málningu sem við áttum inni í skáp og ég málaði eina furuhillu með sömu málningu. Við komum því út á sléttu, endurnýjuðum svo til allt í herberginu og allt endurnýtt stuff. Svona á að gera þetta :) Verst að ég gleymdi að taka "fyrir" myndina, ég set svo "eftir" myndina inn þegar ég er búin að mála skrifborðið.

Merci

Mynd héðan

Frúin er búin að skrá sig á frönskunámskeið sem hefst í kvöld hjá Alliance francaise. Ástæðan fyrir þessu málanámi mínu er auðvitað áhugi minn en líka það að heimasætan er að byrja í frönsku í framhaldsskólanum sínum og því finnst mér upplagt að við lærum þetta saman frá byrjun.
Eins og þetta sé nú ekki nóg er frúin líka í einum áfanga í dreifnáminu sem hefur mallað hægt og rólega undanfarin ár og sér nú fyrir endann á. Mín útskrifast jafnvel í vor!
Planið er að taka ræktina með trompi, mín er komin með kort í World Class og ákveðin í því að verða ekki styrktaraðili heldur virkur meðlimur.
Önnin klárast svo með gönguferð um Toscana með grasa- og sælkeraívafi með góðri vinkonu. Það er því ljóst að mér á ekki eftir að leiðast næstu mánuðina frekar en fyrri daginn

Á kantinum bíður bloggfærsla um handavinnu en ég kláraði loksins prjónaveskið mitt um daginn og svo fékk ég undurfagra heklaða ljósaseríu frá bestu systur í afmælisgjöf. Verð að gefa mér tíma til að mynda herlegheitin.

Línudans

10. desember: Lífið er línudans. Í dag hitti ég góða vinkonu sem býr langt í burtu og við áttum indæla stund saman, spjölluðum um heima og geima. Í dag kom líka í ljós að stjúpdóttir mín sem liggur á sjúkrahúsi eftir aðgerð verður ekki eins fljót að jafna sig og við vonuðum. Vonandi  lagast hún sem fyrst, börnin hennar bíða spennt eftir henni og hún er ekki vön að slá slöku við.

Í dag fórum við líka í afmælisboð til mágkonunnar kæru og fengum heitt súkkulaði og kökur, ekki amalegt það.

Í dag var fyrsta alvöru vetrarveðrið hér í borginni, skafrenningur og þæfingur á götunum. Alltaf gott á svoleiðis dögum þegar allir eru komnir í hús, eins veðurhrædd og ég er. Þegar vetrarveðrin geysa vil ég bara hafa allt mitt fólk hjá mér og njóta samvista við það, alls ekki taka neina áhættu.

jólahreingerning

9. desember: Ég rétt náði þessu inn fyrir miðnætti. Það væri synd að fara að klikka á þessu verkefni núna. Kennsludagurinn var með þeim erfiðari því við vorum að æfa fyrir helgileikinn og það eru alltaf einhverjir vitringar sem eiga bágt með að standa kyrrir og fylgjast með. Þegar ég kom heim fór ég á fullt að þrífa stofuna og holið. Nú er ég að horfa á IQ með Meg Ryan og Tim Robbins, yndisleg mynd og gott mótvægi við vitringana í vinnunni.

Ég ætla að reyna mitt besta til að ná jólaandanum hingað í hús um helgina. Halda áfram að þrífa, baka svolítið, kannski föndra með sætu spætunni, kíkja í jólakaffi til bestu mágkonu. Svona sitt lítið af hverju vegna þess að hamingjan felst í litlu hlutunum í lífinu.

Fallegir dagar

Um síðustu helgi fórum við í brúðkaup stjúpdóttur minnar. Dagurinn heppnaðist eins vel og hugsast gat en stjúpdóttir mín var búin að vinna hörðum höndum að því að skipuleggja öll smáatriði, þetta gekk allt saman upp hjá henni og dagurinn varð fallegur og ljúfur. Sæta spætan fékk að vera í smá hlutverki þennan dag og var önnur brúðarmeyjan, hún naut þess út í ystu æsar þó hún hefði nú viljað hafa meiri tíma til að laga hárið.

Stuttu seinna átti svo heimasætan sautjánda afmælisdaginn sinn og fékk hátíðarmorgunverð en deginum var síðan varið heima hjá yngstu frænku en þær deila afmælisdegi. Um kvöldið komu svo vinir hennar í heimsókn og deginum lauk með bíóferð með kærastanum. Heimasætan duglega tók skriflega ökuprófið um daginn og náði því í fyrstu tilraun með glæsibrag. Verklega prófið er svo eftir nokkra daga. Litla barnið mitt er að verða svo stór, ábyrg og fullorðin, glæsileg stúlka sem ég er óendanlega stolt af.

Svo mikið að gera

Nú er ég farin að bíða eftir því að fá rólega helgi, því þær helgar sem eru komnar frá því að ég byrjaði aftur að vinna hafa verið frekar pakkaðar. Síðasta helgi var t.d. mjög strembin, þá héldum við bekkjarafmæli fyrir sætu spætuna á fimmtudegi, fórum í 4 ára afmæli bróðurdóttur minnar á föstudaginn, fórum í 2 ára afmæli ömmustráksins á laugardeginum, svo héldum við fjölskylduafmæli fyrir spætuna á sunnudeginum. Allt mjög skemmtilegt en svolítið erfitt þegar það er svona mikið að gera.

yndislega páskafrí

Ætli þetta páskahret fari ekki að klárast, bíð spennt eftir vori, hita, sól, sumaryl, grænu grasi og laufguðum trjám.

Þessa köku gerðum við frænkurnar fyrir afmæli JÁG um daginn og auðvitað vakti hún mikla lukku. GMG er að verða snillingur í sykurmassakökum.

Um daginn var sýnikennsla í Gerðubergi. Þar var hægt að læra að gera rósir og kökuskreytingar úr smjörkremi. Sæta spætan var alveg að ná þessu en þá var smjörkremið orðið of heitt og rósirnar láku niður.

Það er alltaf gott að halda í barnið í sér, þetta eru plastdiskarnir sem eru í nestistöskunni okkar fínu. Við vorum að bæta við tveimur diskum í safnið.

Ég keypti poka af filtkúlum í Söstrene Grene um daginn og bjó mér til hálsmen.

Og að lokum tvær af kvikyndinu, hann lætur nú ýmislegt yfir sig ganga greyið.

Kostnaður við myndavegg

Myndaveggurinn minn var nú ekki dýr framkvæmd.

• 2 dósir litaprufa stofn1-5362   kr. 762 (Grágræni liturinn á vegginn)
• Málningalímband 36mm breitt  kr. 1000 (extra breitt til að afmarka ferhyrninginn)
• Límtré fura 30x120cm, rist eftir endilöngu og límt saman kr. 2975 (hillan fyrir ofan ofninn)
• Hilluvinklar 4 stk á kr. 153. Samtals kr. 612 (það var líka hægt að fá næstum eins vinkla fyrir 980 kr stk. Borgar sig að skoða vel í hillurnar)
• Spreybrúsi með hvítri málningu fyrir ramma kr. 1222
• Fann prufudós síðan 2003 inni í skáp með antikhvítu sem ég notaði líka á rammana.
• 3 stk myndakarton fyrir stóru rammana kr. 3620
• Samtals fyrir "project restyle" kr. 10.191

Það þarf ekki alltaf að kosta stórfé að gera huggulegt í kringum sig og um að gera að nýta það sem hægt er að nýta. Svo er það auðvitað umhverfisvænt að nýta áfram það sem til er.

Hundkvikyndið á afmæli næsta mánudag, orðinn eins árs kappinn.

Heimasætan orðin 16 ára

Fyrir 16 árum fæddist þessi yndislega stúlka, 11 merkur og 50 cm, lítil en sterk og dugleg. Hún hefur alltaf haft ákveðnar skoðanir á lífinu og lætur ekki vaða ofan í sig. Hún var skírð í höfuðið á ömmu Stellu, hennar fyrsta barnabarn og þær hafa verið góðar vinkonur alla tíð, Þórunn var ekki nema 9 eða 10 mánaða þegar hún gisti fyrst hjá ömmu sinni og hún hefur gist óteljandi sinnum hjá henni og finnst það alltaf jafnskemmtilegt.
Nú er hún komin í framhaldsskóla, á fullt af góðum vinum og gengur bara allt í haginn, ennþá lítil en sterk og dugleg.
Eftir nokkra daga fer hún í fyrsta ökutímann sinn. Ég hlakka til að fara með henni í æfingaaksturinn og allt hitt sem hún á eftir að taka sér fyrir hendur í framtíðinni.

Haustið er svo fallegur tími, allir þessir litir í náttúrunni, þessi kaldi ferski andvari, alla vega þegar ekki er rok og rigning. Ég skrapp í smástund út að mynda í vikunni, fór nú ekki langt, bara niður götuna mína. Það þarf ekki alltaf að leita langt yfir skammt. Haustlitirnir eru líka fallegir við bæjardyrnar.

Þetta er nú örugglega væmnasta færsla hingað til en maður verður svolítið mjúkur þegar fyrsta barnið manns verður 16 ára. Mér finnst þessi 16 ár hafa flogið hjá.