Hollusta

Við mæðgur fórum á prjónakaffi í gærmorgun. Alveg stórskemmtilegt eins og alltaf en þar fengum við uppskrift af hráköku frá lifraent.is sem heitir snickerskaka. Sæta spætan vildi alveg ólm prófa því í uppskriftinni er slatti af hnetusmjöri sem hún dýrkar en ég dái minna. Kakan heppnaðist alveg súper vel, sætunni fannst hún æði og mér fannst hún bara glettilega góð, það var nefnilega ekki svo mikið hnetusmjörsbragð af henni eftir allt saman.

Skipulag

 Í tilefni konudagsins keypti ég blóm fyrir stofuborðið og köku ársins fyrir afkvæmin og nokkra gesti. Blómin eru dásamlega falleg sérstaklega í dag þegar vetrarsólin skein inn um skítuga gluggana og var með fögur fyrirheit. Mikið hlakka ég til að það hlýni aðeins, þá verður sko rokið út með gluggasápuvatnið.

Kaka ársins stóð alveg undir merkjum, ljúffeng og góð.

 Ég hef verið að sortera og henda dóti úr vinnuherberginu, (úff það sem ég safna af dóti). Skipulagningin er langt komin en enn eru nokkrir kassar í skúrnum sem þarf að fara yfir. Herbergið er orðið bara nokkuð notalegt.

Blúndur og borðar! Hvenær á maður nóg af silkiborðum?

Krukkurnar undan feta ostinum frá Bónus raðast skemmtilega í litlu hilluna. Ég er loksins búin að finna ráð til að ná límógeðinu af þessum fallegu krukkum. Ég legg þær í bleyti með uppþvottavélatöflu yfir nótt, nota svo hníf til að skafa miðana af og set þær svo í uppþvottavélina eina eða tvær umferðir. Ef eitthvað klístur er eftir þegar þessi meðferð er búin næ ég í pottasvampin og tek restina. Hver ætlar að taka að sér að hringja í hr. Bónus og biðja hann að nota lím sem fer af með minni fyrirhöfn?

Á prjónunum er lítill músarangi að fæðast og svo er ungbarnahúfa með uglu í mótun. Sýni það fljótlega.

fjórði

Heimasætan útskrifaðist með pompi og pragt á föstudaginn. Hún fékk meira að segja verðlaun! Fyrir afburða árangur í ensku. Við erum svo stolt af henni að það hálfa væri nóg. Eftir áramót ætlar hún svo að hefja nám í ensku við HÍ og eftir það í eðlisfræði. Veislan heppnaðist alveg frábærlega en við vorum með opið hús fyrir nánustu ættingja og vini. Við buðum upp á súpu og brauð og svo voru sætir molar og kaffi í eftirrétt. Seinna um kvöldið var svo örlítið pottapartý hjá unga fólkinu. Við keyptum aðeins of mikið af brauði með súpunni og daginn eftir voru vangaveltur um hvað ætti að gera við afganginn. Frysta eða gefa smáfuglunum? Allt í einu datt mér í hug að búa til brauðteninga eins og samstarfskona mín í vinnunni gerir. "How to make croutons" var jútúbað og árangurinn lét ekki á sér standa.

 Ég setti svona 1-3 tsk af hverju eftir smekk.

 Slatta af góðri ólívuolíu og annað eins af ISIO4 olíu.

 Hrærði vel saman.

 Bakaði í ofni við 180°C í um 20 mínútur. Hrærði einu sinni í þegar tíminn var hálfnaður.

 Út komu þessir dásamlega ljúffengu og stökku teningar sem smellpassa með súpu eða í salatið.

Jólaundirbúningurinn miðaðist að mestu við stúdentsveisluna en daginn eftir var tekinn algjör power shopping dagur og næstum allar jólagjafir keyptar á um þremur tímum. Núna tveimur dögum fyrir jól er allt tilbúið nema auðvitað að sópa hundahárin upp úr gólfinu (daglega) og skipta á rúmunum.

Annar sunnudagur í aðventu

Þá er annar sunnudagur í aðventu liðinn. Ég bakaði tvær smákökusortir í gær og gerði brauð í morgun. Svo er búið að kaupa nokkrar jólagjafir. Í næstu viku eru jólatónleikar stelpnanna, held ég. Jólaljósin eru komin upp utan á húsinu, jólasveinninn stendur keikur við útidyrnar og jólaóróarnir hanga í stofunni. Jólaundirbúningurinn mjakast áfram.

Aðventan

Þá er aðventan gengin í garð með dimmum dögum og kertaljósum. Jólaskreytingar potast upp með hraða snigilsins, ég skil ekki hvað ég er róleg í þessu þetta árið. Ég hef miklar áhyggjur af því að ég er ekkert farin að baka ennþá, er að vísu búin að baka úr einum pakka úr IKEA en það er nú varla hægt að telja það með. Aðventukransinn er einfaldur þetta árið eins og síðustu ár, er ekki mikil kransatýpa. Ætla samt að búa til einn útikrans úr greni og berjum úr garðinum, komin vika síðan ég keypti grenið!
Dagarnir í vinnunni eru krefjandi svo ekki sé meira sagt þegar skjólstæðingarnir eru að missa sig úr spenningi.

Sæta spætan bað mig að prjóna háa ullarsokka fyrir vetrarskóna sem hana langar að kaupa. Ég var svo heppin að eiga tvær dokkur af jurtalituðu kambgarni frá Hespu og ákvað að prjóna sokkana frá tá og upp til að nýta garnið eins og kostur er. Bláa bandið er hælbandið en ég geri alltaf hælinn eins og þumal.

Svo er ég með þetta sjal á prjónunum og þegar það klárast langar mig að prjóna mér pils, þykkt og gott pils sem hægt er að klæðast utan yfir göngubuxurnar mínar.

Brauðbakstur

http://www.tipjunkie.com/all-crafts/artisan-bread-recipe/

Ég gerði tilraun 2 til að baka þetta brauð um helgina. Ég var búin að sjá þetta á Pinterest fyrir nokkru síðan og langaði að prófa. Þetta er ótrúlega einfalt brauð og tekur enga stund en biðtíminn er svolítið langur eða 14-20 klst.
1 bolli er u.þ.b. 2,5 dl.

Hér er uppskriftin:
3 bollar hveiti (ég notaði 2 af hveiti og 1 af heilhveiti)
1/4 tsk þurrger
1 1/2 tsk salt
1 1/2 bolli volgt vatn

Þetta er hrært saman í skál með sleif. Það þarf ekki að hræra mikið og þetta lítur ekkert sérstaklega vel út þegar búið er að hræra en það er allt í lagi. Strekkið plastfilmu yfir skálina og látið standa á borði í 14-20 klst.

Næsta dag: Deigið hefur tvöfaldast að stærð, er með loftbólum og lyktar af geri. Hvolfið deiginu úr skálinni á borð með hveiti eða durumhveiti (þetta gula sem fæst í IKEA fyrir pizzurnar). Brjótið deigið saman nokkrum sinnum þar til það líkist kúlu. Takið hreint, vel þvegið viskustykki og stráið durumhveiti og hveiti á það, setjið brauðkúluna á, stráið meira hveiti yfir og lokið með hinum helmingnum af viskustykkinu. Látið standa í tvo tíma. Þegar einn tími er liðin, kveikið á ofninum (230°C) og setjið leirpott með loki inn til að hita hann. Þegar tveir tímar eru liðnir, takið leirpottinn úr ofninum og hvolfið brauðinu ofan í heitan pottinn. Setjið lokið á og bakið í ofninum í 30 mínútur. Takið lokið af og bakið í 10-15 mínútur í viðbót.

Látið kólna í 30-60 mínútur og njótið!

Hrökkbrauð

Ég fékk þessa uppskrift að hrökkbrauði frá Svölu vinkonu minni í haust en kom því aldrei í verk að baka fyrr en núna fyrir nokkrum dögum. Þetta er afskaplega einföld og góð uppskrift, bráðholl auðvitað og fljótleg.

• 1 dl sólblómafræ
• 1 dl graskersfræ
• 1 dl hörfræ
• 1 dl sesamfræ
• 1 dl gróft haframjöl
• 3 1/2 dl heilhveiti/spelt
• 1 1/4 dl olía
• 2 dl vatn
• 2 tsk salt

Öllu blandað saman í skál og hrært í með sleif. Ég set bara eina tsk af salti í deigið og geymi hina til að mylja yfir þegar ég er búin að fletja þetta út.

Deiginu skipt í tvennt og flatt út á milli tveggja bökunarpappíra.

Síðan á að skera í deigið með pizzahníf eða kleinujárni til að fá hrökkbrauðið fallegt í laginu en ég gleymdi því auðvitað í hita leiksins og skar í lengjur í staðinn um leið og þetta kom úr ofninum. Hér set ég hina tsk af saltinu yfir.

Bakað í 200°C heitum ofni í um 20 mínútur.

Fallegt, ekki satt? og bragðgott. Meira að segja sæta spætan sem lætur nú yfirleitt ekkert hollt sleppa inn fyrir sínar varir er æst í þetta hrökkbrauð.

Bráðum koma blessuð jólin

22. desember: Jæja þá er allt klárt, við mæðgur kláruðum síðustu hreingerninguna í dag. Nú mega jólin fara að sýna sig. Við ætlum reyndar að halda litlu jólin á morgun, þar sem heimasætan er að syngja í messu að aðfangadag. Á morgun fáum við stjúpdótturina og hennar fjölskyldu í mat til okkar, verðum með kalkún og læti.

Jólalyktin komin í hús með smákökum og mandarínum í bland við hreingerningalyktina. Ég skellti þremur tegundum af smákökum í ofninn í morgun (deig úr IKEA). Á morgun fer eiginmaðurinn í foreldrahús í skötu, ég er ekki enn búin að ákveða hvort ég fer með eða ekki. Ætli það ráðist ekki af því hvað stelpurnar vilja gera.

Smá hundasaga í lokin, aðalleiktíminn hans Tinna er á kvöldin, þá nær hann í eitthvað af dótinu sínu, kemur með það og leggur í lófann á mér og vill að ég togist á við hann.

Kökubakstur

15. desember: Það er nú pínu skondið hvað myndirnar á dagatalinu passa oft við daginn minn, sérstaklega af því að ég opna það ekki fyrr en seint á kvöldin. Mynd dagsins er af krúttlegri dúkku sem heldur á tertu. Góð vinkona mín úr vinnunni er að fara að halda stúdentaveislu í næstu viku og ætlaði að baka kransaköku. Ég bauðst til að hjálpa henni, ekki af því að ég geti bætt einhverju við þekkingu hennar á kransakökubakstri, heldur til að læra þessa list. Hún bakar nefnilega bestu kransakökur sem ég hef smakkað.

Við notuðum pulsustútinn sem önnur samstarfskona mín keypti fyrir mig í Ammeríku í haust. Þetta heppnaðist svona ljómandi vel, þ.e. eftir að við sáum að bæði hnífurinn og sigtið áttu að vera inni í hakkavélinni.

Þetta er höndin á sætu spætunni en hún vildi auðvitað hjálpa til þegar uppáhaldskennarinn hennar var í heimsókn.

Ég er alveg búin að reyna mitt besta til að standa við stóru orðin frá því í síðustu viku að hætta í síðasta lagi kl. 4 í vinnunni og koma mér heim. En ég skil ekki hvað er mikið að gera, það er nú ekki eins og það séu próf fyrir jól í 4. bekk. Aðaltíminn núna fer í að prenta út dagatöl sem ég lét 6. bekk gera í tölvutímum í nóvember og desember. Stóri prentarinn er bilaður og ég verð að nota þann litla og hann er svo leeeeeeengi að prenta að ég er að verða biluð að bíða eftir honum. En kl. hálfsjö í kvöld var ég loksins búin að prenta allt sem tilbúið var. Nú klára þeir síðustu á morgun, það eru ekki nema svona 4 sem eiga eitthvað eftir.

jólahreingerning

9. desember: Ég rétt náði þessu inn fyrir miðnætti. Það væri synd að fara að klikka á þessu verkefni núna. Kennsludagurinn var með þeim erfiðari því við vorum að æfa fyrir helgileikinn og það eru alltaf einhverjir vitringar sem eiga bágt með að standa kyrrir og fylgjast með. Þegar ég kom heim fór ég á fullt að þrífa stofuna og holið. Nú er ég að horfa á IQ með Meg Ryan og Tim Robbins, yndisleg mynd og gott mótvægi við vitringana í vinnunni.

Ég ætla að reyna mitt besta til að ná jólaandanum hingað í hús um helgina. Halda áfram að þrífa, baka svolítið, kannski föndra með sætu spætunni, kíkja í jólakaffi til bestu mágkonu. Svona sitt lítið af hverju vegna þess að hamingjan felst í litlu hlutunum í lífinu.

Aðventan

Komin í helgarfrí, fyrsti sunnudagur í aðventu innan skamms, laufabrauð og piparkökuskreyting fljótlega og ég ekki byrjuð að baka smákökur, hvað er að gerast? Yfirleitt byrja ég að baka smákökur um miðjan október eða í síðasta lagi í byrjun nóvember. Ég ÆTLA að baka eitthvað um helgina, þessi jólasnjór æpir á bakstur og kósíheit.

Ég held ég hafi aldrei haft eins lítið fyrir aðventukransi og í þetta skiptið, kertin eru úr Söstrene Grene og tölustafirnir einnig, kúlurnar eru úr RL-vöruhúsi og bakkann átti ég uppi í skáp.

Hinar einu sönnu bollakökur

Súkkulaðikaka í 2 kaffibollum.
4 msk hveiti
3 msk sykur
3 msk kakó
1 egg (hrært)
1/4 tsk salt
1/4 tsk lyftiduft
3 msk mjólk
1 msk olía

Allt sett í litla skál og hrært með pískara. Hellið deiginu í 2 kaffibolla. Setjið í örbylgjuofn, einn bolla í einu, á fullum styrk í rétt rúmlega eina mínútu (fer samt eftir ofninum).

Uppskriftin er héðan. Í upphaflegu uppskriftinni á að setja karamellur í deigið áður en það er bakað, mér sýnist þetta vera svona eins og Freyju karamellurnar. mmmm væri snilld að kaupa karamellur og prófa það, við notuðum bara heita karamellusósu og rjóma yfir.

Franskar makkarónur

Bakaði franskar makkarónur í dag eftir uppskrift frá Bravetart.com. Þessi kona er líka með góðar leiðbeiningar um svona bakstur.

Heppnaðist bara ágætlega.

Peysan er tilbúin

Reyndar kláraði ég hana fyrir hálfum mánuði en gleymdi alltaf að monta mig af henni. Svo keypti ég þæfðar ullarkúlur í Söstrene Grene og bjó mér til hálsmen sem ég er alveg að fíla.

Ég og heimasætan bjuggum til köku með kaffinu í gær og notuðum restina af sykurmassanum sem var að renna út á tíma en hann geymist í mánuð í ísskáp. Kakan var fín, með smjörkremi og glimmer.

Og svo var það aðalmálið í gær, að búa til súkkulaði skálar með blöðrum eins og ég er búin að vera að sjá á facebook. Mér sýndist á myndunum þaðan að notaðar væru vatnsblöðrur og ég hugsaði mér gott til glóðarinnar því ég vissi að við ættum svoleiðis. Ég blés þær upp með blöðrupumpunni, þær fyrstu sprungu strax þannig að ég passaði að blása þær ekki of mikið upp og náði að binda fyrir. Svo voru þær þvegnar og þurrkaðar. Þegar ég var búin að bræða saman einn poka af hjúpsúkkulaði og eina plötu af suðusúkkulaði var allt tilbúið ...

... þegar ég var búin að reyna þrisvar að dýfa blöðrunum ofan í súkkulaðið og þær sprungu alltaf, með tilheyrandi subbuskap fyrir okkur og eldhúsið mitt, þá ákvað ég að vatnsblöðrur henti bara alls ekki fyrir svona föndur. Herra Galinn var því sendur af stað til að kaupa venjulegar blöðrur og við reyndum aftur með þær.

Það kom í ljós að venjulegar blöðrur eru flottar til að búa til svona súkkulaðiskálar. Ég notaði bökunarpappír á ofnplötu og undir plötuna raðaði ég öllum kælipokunum sem til eru á heimilinu. Þegar við vorum búnar að gera 6 svona skálar settum við þær í ísskáp til að súkkulaðið myndi kólna vel og storkna.

Glæsilegar skálar! Það kom hins vegar í ljós þegar ég ætlaði að ná blöðrunum úr skálunum að það hefði verið sniðugt að maka palmínfeiti eða annarri olíu á blöðrurnar til að skálarnar brotni ekki þegar maður tekur blöðrurnar úr. Það sem maður er búinn að læra á þessu ferli, ekkert venjulegt.

yndislega páskafrí

Ætli þetta páskahret fari ekki að klárast, bíð spennt eftir vori, hita, sól, sumaryl, grænu grasi og laufguðum trjám.

Þessa köku gerðum við frænkurnar fyrir afmæli JÁG um daginn og auðvitað vakti hún mikla lukku. GMG er að verða snillingur í sykurmassakökum.

Um daginn var sýnikennsla í Gerðubergi. Þar var hægt að læra að gera rósir og kökuskreytingar úr smjörkremi. Sæta spætan var alveg að ná þessu en þá var smjörkremið orðið of heitt og rósirnar láku niður.

Það er alltaf gott að halda í barnið í sér, þetta eru plastdiskarnir sem eru í nestistöskunni okkar fínu. Við vorum að bæta við tveimur diskum í safnið.

Ég keypti poka af filtkúlum í Söstrene Grene um daginn og bjó mér til hálsmen.

Og að lokum tvær af kvikyndinu, hann lætur nú ýmislegt yfir sig ganga greyið.