Jólin nálgast eins og óð fluga

Svona er aðventukransinn þetta árið. Einfaldur og látlaus og kostaði ekki krónu. Um að gera að vera hagsýnn á þessum árstíma.
Ég gerði viðburðardagatal fyrir okkur mæðgur nú í lok nóvember þar sem jólasveinninn sinnir frekar yngri börnum og sæta spætan vildi ekki súkkulaðidagatal.

Ég náði mér í grein af birkitré úr garðinum og spreyjaði hana hvíta og nokkra köngla líka sem ég hafði tínt hér í hverfinu.

Svo keypti ég svona spjöld með númerum í IKEA, tveir pakkar, 20 spjöld kostuðu heilar 220 krónur. Á miðana skrifaði ég svo ýmislegt sem við ætlum að gera til að undirbúa jólin, t.d. horfa á jólamynd, fara á kaffihús, pakka inn jólagjöfum, dekur-spa hér heima, baka smákökur, skera út laufabrauð og sitt lítið af hvoru sem kemur okkur í hátíðarskap.

Við erum búnar að skreyta svolítið fyrir jólin, en í ár langar mig mest að hafa hvítt og látlaust í jólaskreytingunum.

Fyrstu aðventuhelgina gerðum við systkinin svo laufabrauð hér í bílskúrnum. Það heppnaðist bara alveg ljómandi vel þó að mamma og pabbi séu að sóla sig í útlöndum en mamma hefur stjórnað þessu í áraraðir.
Og nú er svo ljómandi jólalegt úti, það er vonandi að það haldist nú þannig fram að jólum. Samt ekki of mikinn snjó, takk fyrir.

fjórði

Heimasætan útskrifaðist með pompi og pragt á föstudaginn. Hún fékk meira að segja verðlaun! Fyrir afburða árangur í ensku. Við erum svo stolt af henni að það hálfa væri nóg. Eftir áramót ætlar hún svo að hefja nám í ensku við HÍ og eftir það í eðlisfræði. Veislan heppnaðist alveg frábærlega en við vorum með opið hús fyrir nánustu ættingja og vini. Við buðum upp á súpu og brauð og svo voru sætir molar og kaffi í eftirrétt. Seinna um kvöldið var svo örlítið pottapartý hjá unga fólkinu. Við keyptum aðeins of mikið af brauði með súpunni og daginn eftir voru vangaveltur um hvað ætti að gera við afganginn. Frysta eða gefa smáfuglunum? Allt í einu datt mér í hug að búa til brauðteninga eins og samstarfskona mín í vinnunni gerir. "How to make croutons" var jútúbað og árangurinn lét ekki á sér standa.

 Ég setti svona 1-3 tsk af hverju eftir smekk.

 Slatta af góðri ólívuolíu og annað eins af ISIO4 olíu.

 Hrærði vel saman.

 Bakaði í ofni við 180°C í um 20 mínútur. Hrærði einu sinni í þegar tíminn var hálfnaður.

 Út komu þessir dásamlega ljúffengu og stökku teningar sem smellpassa með súpu eða í salatið.

Jólaundirbúningurinn miðaðist að mestu við stúdentsveisluna en daginn eftir var tekinn algjör power shopping dagur og næstum allar jólagjafir keyptar á um þremur tímum. Núna tveimur dögum fyrir jól er allt tilbúið nema auðvitað að sópa hundahárin upp úr gólfinu (daglega) og skipta á rúmunum.

Total makeover hjá sætu spætu

Við byrjuðum að taka herbergi sætu spætunnar í gegn um páskana. Ég var nú smá upptekin við að klára margmiðlunarnámið þannig að ég kláraði ekki að mála húsgögnin fyrr en núna í vikunni. Við seldum Tromsö háa rúmið hennar með skrifborði undir og keyptum krúttlegt hvítt Ikea járnrúm í staðinn og gamalt furuskrifborð.

Sú sæta vildi endilega mála skrifborðið fjólublátt en þar sem mér finnst fjólublátt vera ljótasti litur í heimi, sagði ég við hana að það væri of mikil vinna að mála skrifborðið upp á nýtt þegar hún fengi leið á fjólubláa litnum og sagðist ætla að mála litlu skúffurnar fjólubláar og keypti svo krúttlegar höldur í Snúðum og snældu.

Ég verð nú að segja að þrátt fyrir fjólubláa litinn þá finnst mér þetta bara vel heppnað makeover. Og ekki nóg með það heldur var þetta svolítið grænt makeover þar sem við keyptum "nýju" húsgögnin notuð. Við komum nokkurn vegin út á sléttu svo ekki er hægt að kvarta yfir kostnaði.

Gleðilegt sumar

Gleðilegt sumar. Góður dagur í dag, 60 dagar í Ítalíuferðina, 10 dagar í að Borgó námið mitt klárist, allt á lokasnúningi þar og gengur framar vonum.

Hamingjuóskir til litlu systur, sem á afmæli í dag. Ég skulda henni afmælisgjöf en hún kemur um leið og um hægist hjá mér.

Við tókum grænt makeover á herbergi sætu spætunnar um páskana. Við seldum skrifborðið undan háa rúminu hennar fyrir 10.000 kr og keyptum venjulegt rúm í staðinn á bland.is fyrir 10.000. Svo seldum við háa rúmið á 6000 kr. með dýnunni sem fylgdi með venjulega rúminu, því hún vildi halda sinni dýnu, og keyptum skrifborð á bland.is fyrir 5000 kr. Það þurfti að mála einn vegg með málningu sem við áttum inni í skáp og ég málaði eina furuhillu með sömu málningu. Við komum því út á sléttu, endurnýjuðum svo til allt í herberginu og allt endurnýtt stuff. Svona á að gera þetta :) Verst að ég gleymdi að taka "fyrir" myndina, ég set svo "eftir" myndina inn þegar ég er búin að mála skrifborðið.

Freezer paper

Ég er búin að vera með hugmynd í kollinum í smá tíma og fyrir nokkrum dögum ákvað ég að skella mér í verkefnið á SPK fundi. Ég tók gamlan, ljótan taupoka og ákvað að nota ammrískan freezer paper sem Systa frænka sendi mér frá Ammríku fyrir nokkrum árum. Þá var bara málið að finna skemmtilegt mynstur til að setja yfir ljótu merkin sem voru óþarflega stór að mínu mati og voru auk þess staðsett báðum megin.

Ég ákvað að gera gras yfir langa merkið. Fyrst teiknaði ég á pappírinn með blýanti, síðan skar ég mynstrið út með föndurhníf.

Svo þurfti að stilla þetta af miðað við merkið. Stensillinn er svo festur á með straujárni, en pappírinn er plasthúðaður og plastið bráðnar ofan í efnið við straujun.

Svo notaði ég Duncan föndurliti til að mála inn í stensilinn. Þegar búið er að mála er stensillinn fjarlægður og þótt furðulegt megi virðast er ekki vottur af plastinu frá pappírnum á efninu.

Þá var það hin hliðin og merkið á henni var jafnvel ljótara og því miður enn stærra. Það var því úr vöndu að ráða hvaða mótiv ætti að verða fyrir valinu. Ég er nú soddan sauður að kindamótiv heilla mig alltaf svolítið. Ég átti líka silfurlitan fatalit sem ég ákvað að nota sem aðallit, silfursauðurinn var að fæðast.

Silfurmálningin var lengi að þorna þannig að ég tók smá pásu og hélt áfram daginn eftir. Það þarf sér stensil fyrir hvern lit.

Silfursauðurinn tilbúinn en mig langar samt að bæta smá útsaumi við, t.d. strá út úr munninum á honum eða blóm á grasið hinum megin. Sé bara til hvað gerist.

Mér fannst þetta nú heppnast ótrúlega vel þó ég segi sjálf frá því ég er handónýt í því að teikna.

Kostnaður við myndavegg

Myndaveggurinn minn var nú ekki dýr framkvæmd.

• 2 dósir litaprufa stofn1-5362   kr. 762 (Grágræni liturinn á vegginn)
• Málningalímband 36mm breitt  kr. 1000 (extra breitt til að afmarka ferhyrninginn)
• Límtré fura 30x120cm, rist eftir endilöngu og límt saman kr. 2975 (hillan fyrir ofan ofninn)
• Hilluvinklar 4 stk á kr. 153. Samtals kr. 612 (það var líka hægt að fá næstum eins vinkla fyrir 980 kr stk. Borgar sig að skoða vel í hillurnar)
• Spreybrúsi með hvítri málningu fyrir ramma kr. 1222
• Fann prufudós síðan 2003 inni í skáp með antikhvítu sem ég notaði líka á rammana.
• 3 stk myndakarton fyrir stóru rammana kr. 3620
• Samtals fyrir "project restyle" kr. 10.191

Það þarf ekki alltaf að kosta stórfé að gera huggulegt í kringum sig og um að gera að nýta það sem hægt er að nýta. Svo er það auðvitað umhverfisvænt að nýta áfram það sem til er.

Hundkvikyndið á afmæli næsta mánudag, orðinn eins árs kappinn.

Tilbúið

Í síðustu viku fékk ég lánaðan myndvarpa í skólanum til að framkvæma leynitrikkið á nýja myndavegginn. Fattaði það eftirá að það hefði verið mikið auðveldara að fá skjávarpann lánaðann sem ég er með í stofunni minn.

Ólöf hjálpaði auðvitað til að mála og stóð sig mjög vel í þessu vandaverki.

Byrjuð að raða myndarömmunum niður til að negla á vegginn, búnar að mála.

Ég veit að það er flottara að nota vinil límmiða en þessi leið er ódýrari og minna vesen en að finna einhvern til að búa til límmiðana fyrir sig.

Myndirnar á leiðinni upp á vegg, Ólöf hjálpar til.

Þetta smákemur.

Allir rammarnir komnir upp, vantar samt myndir í suma þeirra. Ég er nú alveg með á hreinu hvaða myndir eiga að fara í suma rammana en þarf að sjá til með aðra.

Og svo ein mynd í lokin af veggnum eins og hann var í byrjun. Ég er bara mjög ánægð með þetta fyrsta "project restyle" verkefni ársins 2011.
Ég hef ákveðið að fara í nammifrí í febrúar, er að vonast eftir því að standast það. Því fleiri sem ég segi frá því, því meiri þrýstingur.

Nýr matseðill

Ég sá þessa hugmynd á einhverri blogsíðu núna um daginn, get engan vegin munað hvaða, nema þar hafði konan notað járnbökunarbakka sem bakgrunn og svo sett segul aftan á miðana. Ég hugsaði með mér að ég myndi vera í vandræðum með að finna stað fyrir bakkann, þannig að ég ákvað að minn matseðill færi beint á ísskápinn. Einfalt, ekki satt? Ég gerði auðvitað fullt fullt af miðum.

Á miðvikudaginn var alveg geggjuð þoka úti svo ég ákvað eftir þemadag nr. 2 að taka smá pásu áður en kennarafundurinn byrjaði og skjótast og taka myndir af þokunni. Ég fór nú ekki langt en var fegin að ég brá mér aðeins frá því ég var eins og sprungin blaðra eftir daginn.

Flokkum og skilum

 Ég hef ætlað lengi að nýta mér ráð sem ég fann á einhverri umhverfisblogsíðunni fyrir svolítlu síðan, en það er að hafa flokkunarruslaföturnar aðgengilegri en almenna sorpið. Myndin hér fyrir ofan er semsagt af ruslaskápnum okkar eins og hann hefur verið sl. 13 ár. Heimilisfólkið var orðið heldur latt að fara með plast og pappír inn í bílskúr þannig að ég fór í IKEA og keypti þrjár ruslafötur sem smellpassa inn í skápinn, ég var auðvitað búin að mæla þetta allt út og nú er engin afsökun fyrir að flokka ekki. Ég á samt ennþá eftir að finna lausn fyrir járn og ál sem fellur til í eldhúsinu eins og niðursuðudósir og sprittkertaálið.

Svo fínt í ruslaskápnum núna að það hálfa væri yfirdrifið ;-)

Frú Galin er græn eða allavega ljósgræn

Kíkið á flipann hér að ofan "Frú Galin er græn". Var að bæta við löngum lista sem ég fann á einni af mörgum bloggsíðum sem ég hef verið að skoða undanfarið. Ég reyndi að þýða og staðfæra eins og hægt var, sleppti tveimur atriðum sem áttu ekki við Ísland.