Líkanið fína

Heimasætan og vinir hennar hafa hertekið bílskúrinn undanfarna daga til að smíða líkan af þorpinu í leikritinu Beatlejuice. Hún er sem sagt í leikfélaginu líka, eins og það sé ekki nóg að vera á fyrsta ári í menntó, í kór og píanótímum ásamt því að eiga u.þ.b. sautjánhundruðogsúrkál vini sem þurfa sinn tíma að ég tali nú ekki um kærastann. Þetta er búið að vera mjög skemmtilegt verkefni hjá þeim, þær eru alveg búnar að brillera í þessu og hafa stjórnað þessu alveg sjálfar þó að við foreldrarnir höfum hjálpað örlítið til, aðallega með því að framkvæma skipanir eins fljótt og auðið er.

Byrjuð á peysunni

Ég byrjaði á peysunni strax á laugardagskvöldið og kláraði stroffið í gær en varð að bíða þar til í dag með að halda áfram því ég átti ekki prjóna af réttri stærð.

Garn í peysu

Við systur fórum á prjónakaffi í morgun og keyptum okkur báðar heilan helling af dásamlegu garni. Við ætlum báðar að prjóna okkur peysu, meira að segja með sömu uppskriftinni! En þær verða samt ekkert eins því við völdum gjörólíka liti. Garnið heitir Tvinni Tweed og (2) bæði frá Isager. Annað er hrein ull en hitt er blanda af ull og alpaca. Það verður sko fitjað upp á nokkrum lykkjum í kvöld það get ég sagt :)

Nammifríið mitt í febrúar gengur bara vel, ég hef staðist allar freistingar hingað til (það er nú kominn 19.) svo ég á nú örugglega eftir að halda þetta út. Það var samt soldið erfitt eftir síðustu helgi því herra Galinn fékk nefnilega konfektkassa í afmælisgjöf og opnaði hann en ég stóð föst á mínu og fékk mér ekki.

Tinni er eins árs í dag

Tinni litli töffari er orðinn eins árs. Hann er alveg að fíla snjóinn í botn, finnst æðislegt að hlaupa um í snjónum og éta snjó. Hann vill fara út oft á dag núna.

Loksins snjór

Það hlaut að koma að því, snjór í höfuðborginni. Ég hélt nú ekki að ég væri týpan í að óska eftir snjó, en það er bara búið að vera svo dimmt og blautt undanfarið að þetta er ágætistilbreyting. Veit líka að snjór stoppar aldrei lengi við hér á suðvesturhorninu. Vona bara að það verði ekki ófært þegar við systur förum á prjónakaffi.

Kostnaður við myndavegg

Myndaveggurinn minn var nú ekki dýr framkvæmd.

• 2 dósir litaprufa stofn1-5362   kr. 762 (Grágræni liturinn á vegginn)
• Málningalímband 36mm breitt  kr. 1000 (extra breitt til að afmarka ferhyrninginn)
• Límtré fura 30x120cm, rist eftir endilöngu og límt saman kr. 2975 (hillan fyrir ofan ofninn)
• Hilluvinklar 4 stk á kr. 153. Samtals kr. 612 (það var líka hægt að fá næstum eins vinkla fyrir 980 kr stk. Borgar sig að skoða vel í hillurnar)
• Spreybrúsi með hvítri málningu fyrir ramma kr. 1222
• Fann prufudós síðan 2003 inni í skáp með antikhvítu sem ég notaði líka á rammana.
• 3 stk myndakarton fyrir stóru rammana kr. 3620
• Samtals fyrir "project restyle" kr. 10.191

Það þarf ekki alltaf að kosta stórfé að gera huggulegt í kringum sig og um að gera að nýta það sem hægt er að nýta. Svo er það auðvitað umhverfisvænt að nýta áfram það sem til er.

Hundkvikyndið á afmæli næsta mánudag, orðinn eins árs kappinn.

Tilbúið

Í síðustu viku fékk ég lánaðan myndvarpa í skólanum til að framkvæma leynitrikkið á nýja myndavegginn. Fattaði það eftirá að það hefði verið mikið auðveldara að fá skjávarpann lánaðann sem ég er með í stofunni minn.

Ólöf hjálpaði auðvitað til að mála og stóð sig mjög vel í þessu vandaverki.

Byrjuð að raða myndarömmunum niður til að negla á vegginn, búnar að mála.

Ég veit að það er flottara að nota vinil límmiða en þessi leið er ódýrari og minna vesen en að finna einhvern til að búa til límmiðana fyrir sig.

Myndirnar á leiðinni upp á vegg, Ólöf hjálpar til.

Þetta smákemur.

Allir rammarnir komnir upp, vantar samt myndir í suma þeirra. Ég er nú alveg með á hreinu hvaða myndir eiga að fara í suma rammana en þarf að sjá til með aðra.

Og svo ein mynd í lokin af veggnum eins og hann var í byrjun. Ég er bara mjög ánægð með þetta fyrsta "project restyle" verkefni ársins 2011.
Ég hef ákveðið að fara í nammifrí í febrúar, er að vonast eftir því að standast það. Því fleiri sem ég segi frá því, því meiri þrýstingur.