Franskar makkarónur

Bakaði franskar makkarónur í dag eftir uppskrift frá Bravetart.com. Þessi kona er líka með góðar leiðbeiningar um svona bakstur.

Heppnaðist bara ágætlega.

Prjónahelgi

Helginni var eytt í góðum félagsskap kátra prjónakvenna á Sólheimum í Grímsnesi. Við vorum 19 flottar konur sem gistum saman í félagsheimilinu Bergheimum sem er rekið af líknarfélaginu Bergmáli. Við náðum að prjóna alveg heilan helling, borða heilan helling, kjafta heilan helling og hvíla okkur vel á þessum yndislega stað. Á laugardagsmorgninum settumst við nokkrar og gerðum prjónamerki, ég náði að gera 38 prjónamerki. Við ákváðum að styrkja líknarfélagið Bergmál með prjónamerkjum sem þær geta svo selt á markaðnum sínum. Ég gaf 4 sett og samtals gáfum við um 20 prjónamerkjasett.

Nú þarf að fara að huga að því að panta bústað fyrir hina árlegu SPK ferð eftir áramótin. Síðustu tvær ferðir hafa verið algjör snilld.

Fallegir dagar

Um síðustu helgi fórum við í brúðkaup stjúpdóttur minnar. Dagurinn heppnaðist eins vel og hugsast gat en stjúpdóttir mín var búin að vinna hörðum höndum að því að skipuleggja öll smáatriði, þetta gekk allt saman upp hjá henni og dagurinn varð fallegur og ljúfur. Sæta spætan fékk að vera í smá hlutverki þennan dag og var önnur brúðarmeyjan, hún naut þess út í ystu æsar þó hún hefði nú viljað hafa meiri tíma til að laga hárið.

Stuttu seinna átti svo heimasætan sautjánda afmælisdaginn sinn og fékk hátíðarmorgunverð en deginum var síðan varið heima hjá yngstu frænku en þær deila afmælisdegi. Um kvöldið komu svo vinir hennar í heimsókn og deginum lauk með bíóferð með kærastanum. Heimasætan duglega tók skriflega ökuprófið um daginn og náði því í fyrstu tilraun með glæsibrag. Verklega prófið er svo eftir nokkra daga. Litla barnið mitt er að verða svo stór, ábyrg og fullorðin, glæsileg stúlka sem ég er óendanlega stolt af.

Pinterest er mál málanna

(Mynd fundin á Pinterest en kemur héðan)