Lautarferð og skógarhögg

Fyrsta lautarferð sumarsins var farin í síðustu viku. Við völdum einn af fallegri sumardögunum hingað til og héldum af stað yfir í næsta sveitarfélag eða Hlíðargarð í Kópavogi. Garðurinn var nú ekki eins huggulegur og mig minnti (engin blóm neins staðar) en þarna voru góðar grasflatir og auðvitað dásamlegt veður. Við vorum auðvitað vel búin nesti og teppum og lágum og kjöftuðum í tæpa tvo tíma.

Við hjónin erum búin að standa í skógarhöggi í litla garðinum okkar núna tvær helgar í röð. Það sem sést hér á myndinni er bara seinni helmingurinn. Hjónin á bakvið voru alveg til í að uppræta þennan ljóta Alaskavíði sem var settur niður að okkur forspurðum fyrir rúmum 10 árum og hefur farið í taugarnar á mér alveg síðan. Ég var því mjög fegin þegar nágrannarnir komu og voru til í að fella allt hekkið. Þetta hafði þó óvæntar aukaverkanir því þegar hekkið var farið, sást ófrágengni skúrinn og girðingin allt of vel. Það er því næst á dagskrá að gera eitthvað í því máli sem fyrst.

Hellisgerði í Hafnarfirði

Fyrsta formlega lautarferð sumarsins var í gær. Við fórum (að vísu án Þuru og Emmu) til Hafnarfjarðar og gengum aðeins um miðbæinn og gömlu göturnar þar fyrir ofan og slefuðum yfir fallegu húsunum þar. Ég er búin að finna draumahúsið, það stendur við Austurgötu 37 og er guðdómlega fallegt að utan og örugglega ekki síðra að innan. Þegar slefrúntinum var lokið héldum við að Hellisgerði sem er ævintýralegur garður. Þar tókum við upp nesti og höfðum það huggulegt.

Við fórum á svefntímanum hennar Lilju og hún átti að sofa á meðan við gengum um bæinn, en sú stutta ætlaði sko ekki að missa af neinu og vakti allan tímann og naut þess í botn að vera með okkur, rölta um bæinn og garðinn, fá sér af girnilegu nestinu og njóta lífsins.

Smá uppstilling hjá sætu systrunum.

og svo líka hjá frænkunum fallegu. Við fengum yndislegt veður í þessari ferð og lautarferðir eru svo sannarlega mál málanna núna. Það þarf ekki að fara langt eða kosta mikið til að njóta lífsins í góðum félagsskap.

Lautarferð á pallinum

Fyrsta lautarferð sumarsins var haldin á pallinum hér heima í gær. Þórunn kom með tvær vinkonur sínar, ég bauð mömmu, Ólöf kom með tvær vinkonur sínar og Anna og Gísli kíktu við. Þórunn hafði pantað regnbogaköku og ég tók pizzuslaufur úr frystinum. Allt voða huggulegt í góða veðrinu. Við ætlum síðan að reyna að fara næstu lautarferð til Hafnarfjarðar í byrjun vikunnar.

Alltaf gaman að ná fólki þegar það er að borða, hehehe

Tinni varð 5 mánaða í vikunni og af því tilefni vorum við Þórunn með smá myndatöku af kappanum. Við erum búin að fara 7 sinnum á hvolpanámskeiðið og Tinni stendur sig afskaplega vel. Hann ætlar að verða hinn ljúfasti hundur. Ég lenti nú í smá klípu í síðustu viku þegar ég tók að mér að passa pug fyrir frænku hans Sigga. Þeim kom ekki vel saman, vægt til orða tekið, reyndu stanslaust að nauðga hvor öðrum og puginn hafði ekki fætur heldur gorma og fínu girðingarnar okkar voru engin fyrirstaða. Hann strauk tvisvar og það var eins og ég væri að passa ungabörn, ég gat ekki litið af þeim eitt augnablik, úff þetta var ekki mjög skemmtilegt.